 |
| EAC-Office រូបថតពីអាជ្ញាធរអគ្គិសនីកម្ពុជា |
ភ្នំពេញ៖ អាជ្ញាធរអគ្គិសនីកម្ពុជា (EAC) បានចេញសេចក្ដីជូនដំណឹងស្ដីពីការពិគ្រោះយោបល់លើការកែសម្រួលបញ្ជីថ្លៃលក់អគ្គិសនីតាមពេលវេលាថ្ងៃ និងយប់របស់អគ្គិសនីកម្ពុជា។ ក្នុងនោះ អាជ្ញាធរអគ្គិសនីកម្ពុជា គ្រោងកែសម្រួលបញ្ជីថ្លៃលក់ ពេលថ្ងៃថ្លៃខ្ពស់ ជាងពេលយប់។ ជាមួយគ្នានេះ ការគ្រោងកែសម្រួលនេះ អាជ្ញាធរអគ្គិសនីកម្ពុជា ក៏បានស្នើសុំឲ្យអ្នកប្រើប្រាស់ទាំងអស់ ផ្ដល់មតិយោបល់លើគម្រោងនេះ ចាប់ពីថ្ងៃជូនដំណឹងនេះ រហូតដល់ថ្ងៃទី២៨ កុម្ភៈ។
អាជ្ញាធរអគ្គសិនីកម្ពុជា( EAC) បានពិនិត្យ គណនាលើសំណើរបស់អគ្គិសនីកម្ពុជា (EDC) ដែលសុំកែសម្រួលបញ្ជីថ្លៃលក់អគ្គិសនី តាមពេលវេលា សម្រាប់ផ្ដល់ជម្រើសដល់អ្នកប្រើប្រាស់ធុនធំ ភ្ជាប់លើតង់ស្យុងមធ្យម ប្រភេទឧស្សាហកម្ម ពាណិជ្ជកម្ម និងកសិកម្មជាដើម។ ទាក់ទងគ្នានេះ អតិថិជនដែលកំពុងប្រើប្រាស់ និងអតិថិជនថ្មី អាចបង្វែរ និងជ្រើសរើសយកជម្រើសថ្លៃអគ្គិសនីតាមពេលវេលាផ្សេងៗ ដោយពេលថ្ងៃអាត្រាថ្លៃខ្ពស់ និងពេលយប់អាត្រាថ្លៃទាប។ នេះបើតាមសេចក្ដីជូនដំណឹងរបស់អាជ្ញាធរអគ្គិសនីកម្ពុជា ដែលចេញផ្សាយកាលពីថ្ងៃទី០២ កុម្ភៈ។
ជាមួយគ្នានេះ អាជ្ញាធរអគ្គិសនីកម្ពុជា បានបញ្ជាក់ថា ដើម្បីឲ្យមានតម្លាភាព អាជ្ញាធរអគ្គិសនី ក៏បានស្នើសុំឲ្យក្រសួង ស្ថាប័ន និងអ្នកប្រើប្រាស់ទាំងអស់ ដែលពាក់ព័ន្ធនឹងបញ្ជីថ្លៃលក់អគ្គិសនីតាមពេលវេលានេះ សុំចូលរួមផ្ដល់មិតយោបល់លើគម្រោងកែសម្រួលនេះផងដែរ។ សម្រាប់ការផ្ដល់មតិយោបល់នេះ ចាប់ពីថ្ងៃជូនដំណឹង រហូតដល់ថ្ងៃទី ២៨ ខែកុម្ភៈ ឆ្នាំ២០១៧ ប៉ុន្តែក្រោយពីថ្ងៃទី២៨ ខែកុម្ភៈ គម្រោងកែសម្រួលនេះ នឹងត្រូវចាត់ទុកថាបានឆ្លងកាត់ការពិគ្រោះយោបល់រួច។ ម្យ៉ាងទៀត អាជ្ញាធរអគ្គិសនីកម្ពុជា នឹងអាចពិនិត្យ និងអនុម័តកែសម្រួលបញ្ជីថ្លៃលក់នេះ ទៅតាមការកំណត់របស់ច្បាប់ស្ដីពីអគ្គិសនី។
អាជ្ញាធរអគ្គិសនីកម្ពុជា បានបន្ថែមថា ការផ្ដល់យោបល់លើគម្រោងកែសម្រួលបញ្ជីថ្លៃលក់អគ្គិសនីតាមពេលវេលានេះ អតិថិជន និងអ្នកប្រើប្រាស់ទាំងអស់ ត្រូវមានមូលដ្ឋានសំអាងគ្រប់គ្រាន់ ដើម្បីឲ្យអាជ្ញាធរអគ្គិសនីកម្ពុជាអាចពិនិត្យបាន ទៅតាមការកំណត់របស់ច្បាប់ស្ដីពីអគ្គិសនីនៃប្រទេសកម្ពុជា៕
ថ្មីៗ
អត្ថបទ : ញឹក ស្រីល័ក្ខ
No comments:
Post a Comment