ខ្មែរសម័យថ្មី

សាលារាជធានីអនុញ្ញាតឲ្យជនពិការប្រគំតន្ត្រីនៅវត្តភ្នំសប្ដាហ៍ក្រោយ

ជនពិការចូលរួមក្នុងកម្មវិធីរត់ប្រណាំងដើម្បីសង្គមមួយគ្មានពិការភាព នៅពហុកីឡដ្ឋានជាតិអូឡាំពិក កាលពីព្រឹកថ្ងៃទី១៥ ខែធ្នូ ឆ្នាំ២០១៦។ RFA

សាលារាជធានីភ្នំពេញ អនុញ្ញាតឲ្យជនពិការដែលច្រៀងតាមដងផ្លូវ និងស្តុបនាពេលកន្លងទៅកំណត់ពេលជួបប្រជុំគ្នា ដើម្បីចែកវេនច្រៀងនៅរមណីយដ្ឋានប្រវត្តិសាស្ត្រវត្តភ្នំ។ ចំណែក២ កន្លែងផ្សេងទៀត សាលារាជធានីនឹងរៀបចំជូនពួកគាត់ជាបន្តបន្ទាប់។ មន្ត្រីសាលារាជធានីសង្ឃឹម បងប្អូនជនពិការនឹងមិនទៅប្រគំនៅតាមផ្លូវសាធារណៈទៀតទេ។

សាលារាជធានីភ្នំពេញ បានអនុញ្ញាតឲ្យជនពិការ អាចប្រគំតន្ត្រីនៅរមណីយដ្ឋានប្រវត្តិសាស្ត្រវត្តភ្នំ ជាលើកដំបូង នៅសប្ដាហ៍ក្រោយ។

អ្នកនាំពាក្យ និងជាអភិបាលរងសាលារាជធានីភ្នំពេញ លោក មាន ចាន់យ៉ាដា មានប្រសាសន៍នៅថ្ងៃទី៤ កុម្ភៈ ថា ថ្ងៃច័ន្ទសប្ដាហ៍ក្រោយ ក្រុមជនពិការទាំង ៥ក្រុមដែលមានសមាជិក ១៩៤នាក់ នឹងជួបប្រជុំគ្នានៅក្រសួងសង្គមកិច្ចរៀបចំដាក់កម្មវិធីចែកវេនចែកថ្ងៃគ្នា ដើម្បីប្រគំតន្ត្រីជនពិការនៅសប្ដាហ៍ក្រោយ។ លោកបញ្ជាក់ថា ចំណែកទីតាំងចំនួន ២ទៀត គឺសួនអតីតទីលានប្រជាធិបតេយ្យ និងសួនច្បារមុខវត្តបទុមវតី មន្ត្រីសាលារាជធានី កំពុងសិក្សា និងគូរប្លង់ ដូច្នេះអាចនឹងរួចរាល់ប្រហែល ៣ ទៅ ៤សប្ដាហ៍ទៀត។ រីឯទីតាំងប្រគំតន្ត្រីជនពិការដំបូងនៅរមណីយដ្ឋានវត្តភ្នំនេះ មានភ្ញៀវទេសចរច្រើនដែលអាចឲ្យបងប្អូនជនពិការទទួលបានជំនួយពីសប្បុរសជនច្រើនគួរសមដែរ។

លោក មាន ចាន់យ៉ាដា៖ «គាត់នឹងជួបគ្រប់ក្រុមទាំងអស់ ដើម្បីគាត់ដាក់កម្មវិធីគ្នាគាត់ ហើយយើងជួយត្រួតពិនិត្យគាត់តែប៉ុណ្ណឹង ឲ្យគាត់ស្រុះស្រួលគ្នា ព្រោះបច្ចុប្បន្ននេះយើងមានក្រុមជនពិការ ៥ក្រុម នៅក្នុង ១ថ្ងៃមានភ្ញៀវទេសចរជាតិ អន្តរជាតិ ជាង ១ពាន់ដែរ»។

នាយកប្រតិបត្តិសមាគមតន្ត្រីសំនៀងជនពិការ លោក ចាប តូ ដែលជាជនពិការភ្នែកមួយរូបដែរ ថ្លែងថា លោករីករាយដែលសាលារាជធានីរៀបចំឲ្យពួកគាត់ប្រគំតន្ត្រីនៅវត្តភ្នំ។ តែទោះយ៉ាងណា លោកស្នើឲ្យសាលារាជធានីពន្លឿនការរៀបចំទីតាំង ២កន្លែងផ្សេងទៀត ឲ្យបានឆាប់រហ័សជូនពួកគាត់ ដើម្បីកុំឲ្យអូសបន្លាយពេលវេលាយូរជាងនេះទៀត ពីព្រោះពួកគាត់កំពុងជួបបញ្ហាជីវភាព៖ «ខ្ញុំសូមអំពាវនាវដល់សប្បុរសជនទាំងអស់ ដែលអញ្ជើញមកចូលរួមក្នុងរមណីយដ្ឋានវត្តភ្នំ ទីលានប្រជាធិបតេយ្យ ដូចជាវត្តបទុមវតី បើឃើញការប្រគំតន្ត្រីលក្ខណៈអាជីព (Professional) របស់បងប្អូនជនពិការ សូមមេត្តាជួយឧបត្ថម្ភជាថវិកា ឬជាសម្ភារៈ ដើម្បីដោះស្រាយជីវភាពប្រចាំថ្ងៃ ដើម្បីលើកទឹកចិត្តដល់ជនពិការជាជាងគាត់យកសមត្ថភាពគាត់មានដើរសុំទាន ជួយគាំទ្រវិស័យពិការភាព និងវិស័យសិល្បៈជនពិការ»។

ទាក់ទងនឹងការផ្ដល់ទីតាំងប្រគំតន្ត្រីនេះ សង្គមស៊ីវិលធ្វើការលើកស្ទួយសិទ្ធិជនពិការ និងជនពិការ កន្លងទៅបានស្នើឲ្យសាលារាជធានីភ្នំពេញ រៀបចំផ្ដល់ទីតាំងឲ្យជនពិការប្រគំតន្ត្រីចំនួន ៥ទីតាំង ឬច្រើនជាងនេះ ដើម្បីកុំឲ្យមានភាពប្រទាញប្រទង់ ពីព្រោះក្រុមចម្រៀងជនពិការមានចំនួនច្រើន ដែលធ្វើដូច្នេះ អាចឲ្យពួកគាត់មានលទ្ធភាពទទួលបានជំនួយពីសប្បុរសជនច្រើន។

ឆ្លើយតបទៅនឹងសំណើនេះ មន្ត្រីសាលារាជធានីដដែលអះអាងថា មិនអាចផ្ដល់ទីតាំងលើសពី៣ កន្លែងជូនបានទេ ដោយបញ្ជាក់ថា ទីតាំងចំនួន៣ ដែលសាលារាជធានីជ្រើសរើសនេះមិនមែនជាឧបសគ្គក្នុងការទទួលបានជំនួយពីសប្បុរសជននោះឡើយ គឺជាទីតាំងដ៏ល្អសម្រាប់ជនពិការ៕

RFA
ដោយ ខែ សុណង

សាលារាជធានីអនុញ្ញាតឲ្យជនពិការប្រគំតន្ត្រីនៅវត្តភ្នំសប្ដាហ៍ក្រោយ

បក្សកាន់អំណាចកំពុងប្រមូលហត្ថលេខាតំណាងរាស្ត្រធ្វើវិសោធនកម្មច្បាប់បក្សនយោបាយ

អ្នកនាំពាក្យគណបក្សប្រជាជនកម្ពុជា លោក សុខ ឥសាន ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី១០ ខែមីនា ឆ្នាំ២០១៦។

នៅពេលនេះ គណបក្សប្រជាជនកម្ពុជា កំពុងប្រមូលហត្ថលេខាតំណាងរាស្ត្រនៃគណបក្សនេះ ដើម្បីដាក់ទៅសភា សម្រាប់ស្នើធ្វើវិសោធនកម្មច្បាប់ស្ដីពីគណបក្សនយោបាយ តាមការចង់បានរបស់លោកនាយករដ្ឋមន្ត្រី ហ៊ុន សែន។ ទាក់ទងរឿងនេះ ប្រធានក្រុមតំណាងរាស្ត្រគណបក្សសង្គ្រោះជាតិ ទាមទារឲ្យគណបក្សកាន់អំណាចកែច្បាប់នេះឲ្យមានប្រយោជន៍ដល់គ្រប់គណបក្សនយោបាយ។

មិនមានអ្វីដែលជាឧបសគ្គចំពោះគណបក្សប្រជាជនកម្ពុជា ក្នុងដំណើរឆ្ពោះទៅធ្វើវិសោធនកម្ម ឬកែច្បាប់ស្ដីពីគណបក្សនយោបាយ ដែលគណបក្សនេះយល់ថា ធ្វើបានកាន់តែលឿន កាន់តែល្អ ព្រោះយល់ថាមាត្រាខ្លះនៃច្បាប់ហួសសម័យ ដូច្នេះត្រូវធ្វើឲ្យទាន់សភាពការណ៍។

អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា ក្រុមប្រឹក្សាផ្នែកច្បាប់របស់គណបក្សប្រជាជនកម្ពុជា ដែលមានសមាសភាពចម្រុះមកពីក្រុមប្រឹក្សាធម្មនុញ្ញ គណៈកម្មការទី៦ នៃរដ្ឋសភា ក្រសួងយុត្តិធម៌ និងទីស្ដីការគណៈរដ្ឋមន្ត្រី កំពុងពិនិត្យមើលសេចក្ដីព្រាងថ្មី។ ទោះយ៉ាងនេះក្ដី លោក សុខ ឥសាន មិនទាន់ឲ្យដឹងថា គណបក្សប្រជាជនកម្ពុជា កែប្រែមាត្រាណាខ្លះនៅឡើយទេ ដោយលោកបញ្ជាក់ថា ការធ្វើវិសោធនកម្មនេះ មិនមែនកែត្រឹមការហាមមិនឲ្យអ្នកមានទោសធ្វើជាប្រធាន និងអនុប្រធានគណបក្សនយោបាយប៉ុណ្ណោះទេ៖ «យើងត្រូវធ្វើឲ្យស្របតាមសភាពការណ៍ជាក់ស្ដែងថ្មី ហើយដែលយើងឆ្លងកាត់ការអនុវត្តកន្លងទៅមានចំណុចណាខ្វះចន្លោះ យើងត្រូវបំពេញបន្ថែម។ យើងធ្វើនេះមិនមែនសំដៅទៅបុគ្គល ក ឬបុគ្គល ខ នោះទេ។ យើងធ្វើសម្រាប់បុគ្គល ក និងបុគ្គល ខ នៃគណបក្សនយោបាយទាំងអស់»។

ច្បាប់ស្ដីពីគណបក្សនយោបាយដែលមាន ១១ជំពូក ៤៥មាត្រា បានបង្កើតឡើងកាលពីឆ្នាំ១៩៩៧។ តាមច្បាប់តំណាងរាស្ត្រ មួយភាគបួន ឬជាង ៣០រូបនៃតំណាងរាស្ត្រសរុប អាចស្នើសុំធ្វើវិសោធនកម្មច្បាប់។

អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា សំណើកែប្រែច្បាប់គណបក្សនយោបាយនេះ គណបក្សប្រជាជនកម្ពុជា នឹងប្រមូលហត្ថលេខារបស់តំណាងរាស្ត្រពី ៤០រូបទៅ ៥០រូប។

បើតាមលោក សុខ ឥសាន បែបផែននៃដំណើរការធ្វើវិសោធនកម្មច្បាប់មានដំណាក់កាលដូចជា ក្រោយពីបានប្រមូលហត្ថលេខារបស់តំណាងរាស្ត្ររួចហើយ ត្រូវប្រគល់ទៅគណៈអចិន្ត្រៃយ៍សភា ហើយគណៈអចិន្ត្រៃយ៍បញ្ជូនទៅគណៈកម្មការជំនាញនៃរដ្ឋសភា និងបន្ទាប់ពីគណៈកម្មការជំនាញត្រួតពិនិត្យរួចហើយ ត្រូវប្រគល់ត្រឡប់មកគណៈអចិន្ត្រៃយ៍សភាវិញ ទើបគណៈអចិន្ត្រៃយ៍កំណត់ថ្ងៃប្រជុំសភាដើម្បីអនុម័ត។

ប្រធានក្រុមតំណាងរាស្ត្រគណបក្សសង្គ្រោះជាតិ លោក សុន ឆ័យ សម្ដែងការហួសចិត្តចំពោះគម្រោងធ្វើវិសោធនកម្មនេះ ព្រោះលោកប្រាប់ថា ច្បាប់ស្ដីពីគណបក្សនយោបាយមិនទាន់អនុវត្តបានគ្រប់មាត្រាផង ស្រាប់តែពេលនេះត្រូវធ្វើវិសោធនកម្មទៀត។ លោកយល់ថា ដើម្បីឲ្យការធ្វើវិសោធនកម្មនេះមានសមធម៌ ត្រូវកំណត់ហិរញ្ញវត្ថុរបស់គណបក្សនយោបាយក្នុងពេលធ្វើការឃោសនាឲ្យស្មើៗគ្នា។ ផ្ទុយពីលោក ហ៊ុន សែន លោក សុន ឆ័យ នៅតែយល់ថា ប្រធាន ឬអនុប្រធានគណបក្សមួយ ប្រសិនបើសមាជិកនៃគណបក្សនោះគាំទ្ររួចហើយ មិនត្រូវមានច្បាប់ណាហាមប្រាមនោះទេ៖ «មេបក្សនៅក្នុងគណបក្សនយោបាយដែលមានការគាំទ្រពីសមាជិករបស់គេ ត្រូវតែការពារ មានសមាជិករបស់គាត់ដែលមានសិទ្ធិដោះដូរ មិនត្រូវមានច្បាប់ណាហាមប្រាមនោះទេ»។

លោក សុន ឆ័យ ក៏ចង់ឃើញវិសោធនកម្មច្បាប់ស្ដីពីការបោះឆ្នោតបន្ថែមទៀត ដើម្បីហាមមិនឲ្យមន្ត្រីយោធា និងមន្ត្រីរដ្ឋប្រើអំណាច និងតួនាទីរបស់ខ្លួនទៅឃោសនាគាំទ្រគណបក្សនយោបាយ។

ប្រធានគណៈកម្មាធិការអព្យាក្រឹត និងយុត្តិធម៌ ដើម្បីបោះឆ្នោតដោយសេរី និងត្រឹមត្រូវនៅកម្ពុជា និកហ្វិច (NICFEC) លោក សំ គន្ធាមី មានប្រសាសន៍ថា ក្នុងពេលកំពុងមានវិបត្តិនយោបាយដូចនេះ មិនត្រូវធ្វើវិសោធនកម្មច្បាប់នយោបាយឡើយ ព្រោះនឹងដាក់បន្ទុកទៅគណបក្សនយោបាយនៅក្រៅរដ្ឋាភិបាល។ លោកបន្តទៀតថា ច្បាប់ស្ដីពីគណបក្សនយោបាយសព្វថ្ងៃ នៅប្រើប្រាស់បាន ដែលមិនទាន់ហួសសម័យនៅឡើយទេ៖ «ប្រុងធ្វើវិសោធនកម្មដូចប្រញាប់ពេក។ ខ្ញុំមើលទៅវិសោធនកម្មនេះ មិនមែនជួយដល់គណបក្សនយោបាយទេ បែរជាធ្វើឲ្យផុយស្រួយទៅវិញទេ»។

ប្រធានគណបក្សប្រជាជនកម្ពុជា លោក ហ៊ុន សែន កាលពីថ្ងៃទី១ ខែមករា ប្រាប់ទៅក្រុមការងាររបស់លោក គួរលុបឈ្មោះគណបក្សនយោបាយដែលបានបញ្ជូនឈ្មោះទៅក្រសួងមហាផ្ទៃ រួចហើយ ប៉ុន្តែមិនអាចរកស្នាមមេដៃអ្នកគាំទ្រ ៤.០០០នាក់ក្នុងរយៈពេលកំណត់។ ចំណុចមួយទៀត លោក ហ៊ុន សែន ចង់យកគំរូតាមប្រទេសថៃ ដោយកំណត់ថា បើប្រធានគណបក្សណាប្រព្រឹត្តកំហុសធ្ងន់ធ្ងរ ត្រូវរំលាយគណបក្សចោល និងហាមមេដឹកនាំ និងគណៈកម្មការនាយកនៃគណបក្សមិនឲ្យធ្វើនយោបាយក្នុងរយៈពេលណាមួយ។

ចំណុចមួយទៀត លោក ហ៊ុន សែន ទាមទារឲ្យលុបឈ្មោះគណបក្សណាដែលទទួលជំនួយពីបរទេស ប៉ុន្តែបើជំនួយរបស់ពលរដ្ឋខ្មែរនៅក្រៅប្រទេស អនុញ្ញាតឲ្យទទួលបាន។ ចំណុចរសើបមួយទៀត លោក ហ៊ុន សែន នៅតែនិយាយដដែលថា នឹងហាមមិនឲ្យអ្នកមានទោស ធ្វើជាប្រធាន និងអនុប្រធានគណបក្សនយោបាយ។ ចំណែកលោក សម រង្ស៊ី ហៅឥរិយាបថចុងក្រោយរបស់លោក ហ៊ុន សែន បែបនេះ ថាព្រោះលោកនាយករដ្ឋមន្ត្រីកំពុងភ័យស្លន់ស្លោខ្លាចចាញ់ឆ្នោត៕

RFA
ដោយ ប្រាជ្ញ ចេវ

បក្សកាន់អំណាចកំពុងប្រមូលហត្ថលេខាតំណាងរាស្ត្រធ្វើវិសោធនកម្មច្បាប់បក្សនយោបាយ

អ្នកនាំពាក្យCPP៖ ជនដែលខំស្រែករឿងកោះត្រល់ល្មមឈប់ស្រែកទៅគ្រាន់តែជាការឃោសនា នយោបាយធ្វើឲ្យខ្មែរបែកបាក់

ភ្នំពេញ: មន្ត្រីជាន់ខ្ពស់គណបក្សប្រជាជនកម្ពុជាបានថ្លែងថា ជនដែលខំស្រែកដាក់កំហុសមកលើរាជរដ្ឋាភិបាលសព្វថ្ងៃ ពាក់ព័ន្ធរឿងកោះត្រល់ វាគ្រាន់តែជាការឃោសនាដើម្បីកេងចំណេញនយោបាយ និងធ្វើឲ្យខ្មែរបែកបាក់ និងកាន់តែឈឺចាប់ប៉ុណ្ណោះហើយកុំនិយាយថា ខ្លួនស្នេហាជាតិលើសគេ លើសឯងនោះ វាមិនផេះទេ ល្មបឈប់ស្រែកទៅ។

ដោយមន្ត្រីរូបនោះបានលើកឡើងថា ក្នុងនាមជាជនជាតិខ្មែរពិតជាមានការសោកស្តាយនូវការបាត់បង់កោះត្រល់តែធ្វើដូចម្តេចបើនេះវាជាផលវិបាកនៃប្រវត្តិសាស្ត្របានត្រឹមសោកស្តាយប៉ុណ្ណោះ។

លោកសុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងតាមសារអេឡិចត្រូនិចថា កោះត្រល់ ជាកោះមួយធំរបស់កម្ពុជាតាំងពីមុនឆ្នាំ១៩៣៩ដែលមានចម្ងាយតែ១៥គ.ម ពីឆ្នេរខេត្តកំពត មានចម្ងាយ៤៥គ.ម ពីឆ្នេរខត្តហាទៀង ប្រទេសវៀតណាម។

ស្ថិតនៅក្រោមនឹមអាណានិគមបារាំងនៅឆ្នាំ១៩៣៩បារាំងបានសំរេចផ្ទេរការគ្រប់គហរងកោះត្រល់ពីកម្ពុជាទៅឲ្យស្ថិតនៅក្រោមការគ្រប់គ្រងរបស់អាជ្ញាធរកូសាំងស៊ីនដោយអត្តនោម័តរបស់អគ្គទេសាភិបាលបារាំងឈ្នោះប្រេវីយេដោយគ្មានការតវ៉ា។ នៅឆ្នាំ១៩៤៩ គឺ១០ឆ្នាំក្រោយមកបារាំងបានប្រគល់ដែនដីកូសាំងស៊ីន មកឲ្យស្តេចបាវដាយនៃប្រទេសអាណ្ណាម ក៏រួមមានកោះត្រល់នេះដែរ។គ្មសនការតវ៉ាពីរាជរដ្ឋាភិបាលខ្មែរពេលនោះទេ។ នៅពេលសម្តេចព្រះ នរោត្តម សីហនុ ទាមទារឯករាជ្យពីបារាំងក៏មិនបានទាមទារកោះត្រល់ដែរក្នុងក្រទ្បាផ្ទៃប្រទេសកម្ពុជា១៨១០៣៥គម២ មិនមានកោះត្រល់ទេ។រហូតមកដល់សម័យខ្មែរក្រហមគ្រប់គ្រងក៏ខ្មែរក្រហមចង់វាយយកកោះត្រល់មកវិញដែរតែមិនអាចទៅរួចទីបំផុតមហិច្ឆតាចង់បានកោះត្រល់របស់ ខ្មែរក្រហមបានត្រឹមទទួលស្គាល់កោះត្រល់ជារបស់វៀតណាម។

លោកបានបញ្ជាក់ថា ក្នុងនាមជាជនជាតិខ្មែរយើងពិតជាមានការសោកស្តាយនូវការបាត់បង់កោះត្រល់តែធ្វើដូចម្តេចបើនេះវាជាផលវិបាកនៃប្រវត្តិសាស្ត្របានត្រឹមសោកស្តាយប៉ុណ្ណោះ។ ជនដែលខំស្រែកដាក់កំហុសមកលើរាជរដ្ឋាភិបាលសព្វថ្ងៃ វាគ្រាន់តែជាការឃោសនានយោបាយធ្វើឲ្យខ្មែរបែកបាក់និងកាន់តែឈឺចាប់ប៉ុណ្ណោះកុំនិយាយថាខ្លួនស្នេហាជាតិលើសគេលើសឯងនោះ វាមិនផេះទេល្មបឈប់ស្រែកទៅ៕

CEN
ដោយ: មុនីរាជ

អ្នកនាំពាក្យCPP៖ ជនដែលខំស្រែករឿងកោះត្រល់ល្មមឈប់ស្រែកទៅគ្រាន់តែជាការឃោសនា នយោបាយធ្វើឲ្យខ្មែរបែកបាក់

ប្រតិភូថៃ១ក្រុម ចូលតាមច្រកទ្វារអានសេះ ជួបជនពិការ ដើម្បីផ្តល់អំណោយជើងសិប្បនិមិត្ត

ព្រះវិហារ: ប្រជាពលរដ្ឋរួមទាំងអតីតទាហានពិការជើងដោយសារគ្រាប់មីននៅស្រុកជាំក្សាន្តមានភ័ព្វសំណាងទទួលបានជំនួយឧត្ថម្ភជើងសិប្បនិមិត្តពីប្រតិភូថៃមួយក្រុមមានចំនួនជាង២០នាក់ដឹកនាំដោយលោកអភិបាលស្រុកណាមយឺនដែលទទួលស្វាគមន៍ដោយអាជ្ញាធរស្រុកជាំក្សាន្តកាលពីព្រឹកថ្ងៃទី០៤ខែកុម្ភះឆ្នាំ២០១៧។

ប្រតិភូថៃចូលមកស្រុកជាំក្សាន្តតាមច្រកទ្វារអានសេះហើយអញ្ជើញទៅជួបសំណេះសំណាលជាមួយជនពិការប្រុសស្រីទាំង៣០នាក់នៅរដ្ឋបាលស្រុកជាំក្សាន្តតែម្តង។

អភិបាលស្រុកជាំក្សាន្តលោកជាកឹមសេងបានអោយដឹងនៅរសៀលថ្ងៃទី០៤ខែកុម្ភះថាប្រតិភូថៃមានចំនួន២៦នាក់ដឹកនាំដោយលោកអភិបាលស្រុកណាមយឺនក្នុងបុគ្គលិកសកលវិទ្យាល័យនៅទីក្រុងបាងកកជំនាញផលិតជើងសិប្បនិមិត្តមានចំនួន២១នាក់។

មកដល់រសៀលថ្ងៃដដែលនេះក្រុមការងារថៃកំពុងវាស់ពុម្ពជើងជនពិការទាំង៣០នាក់ដើម្បីយកលទ្ធផលរបាយការណ៍ជាក់ស្តែងដើម្បីផលិតជើងសិប្បនិមិត្តនៅទីក្រុងបាងកកវិញ។លោកជាគឹមសេងថ្លែងអោយដឹងថានេះជាលើកទី១ហើយដែលជនពិការយើងទទួលបានអំណោយជើងសិប្បនិមិត្តពីប្រតិភូថៃ។

លោកអភិបាលស្រុកបន្តថាជនពិការប្រុសមានចំនួន២៨នាក់និងស្រី០២នាក់គឺរងគ្រោះដោយសារជាន់មីនដែលបន្សល់ទុកក្នុងសង្គ្រាមស៊ីវិវិល។លោកថ្លែងថានៅថ្ងៃទី១៨ខែកុម្ភះខាងមុខនេះប្រតិភូថៃនឹងនាំយកជើងសិប្បនិមិត្តដែលផលិតបានយកមកអោយជនពិការទាំង៣០នាក់ដើម្បីពាក់សាកមើលហើយលោកអ៊ុនចាន់ដាអភិបាលខេត្តព្រះវិហារនឹងអញ្ជើញមកចូលរួមទទួលប្រតិភួថៃនិងជួបសំណេះសំណាលជាមួយបងប្អូនជនពិការផងដែរ៕

CEN
ដោយ: អង្គរវត្ត

ប្រតិភូថៃ១ក្រុម ចូលតាមច្រកទ្វារអានសេះ ជួបជនពិការ ដើម្បីផ្តល់អំណោយជើងសិប្បនិមិត្ត

តុលាការអាមេរិក បើកសវនាការរឿងលោកមាជ សុវណ្ណារ៉ា ប្តឹងនាយករដ្ឋមន្ត្រី និងកូនប្រុស

ភ្នំពេញ: នៅថ្ងៃទី៦ ខែកុម្ភៈ ដើមសប្តាហ៍ក្រោយនេះ តុលាការសហរដ្ឋអាមេរិកនឹងបើកសវនាការលើសំណុំរឿង លោកមាជ សុវណ្ណារ៉ា មន្ត្រីជាន់ខ្ពស់គណបក្សសង្គ្រោះជាតិ ប្តឹងសម្តេចនាយករដ្ឋមន្ត្រី ហ៊ុន សែន និងលោក ហ៊ុន ម៉ាណែត ពាក់ព័ន្ធនឹងសំណុំរឿង“ធ្វើភេរវកម្ម” និង “ធ្វើទារុណកម្មតាមរយៈការឃុំខ្លួនស្រេចតែអំពើចិត្ត ក្រៅច្បាប់និងរយៈពេលយូរ”។

លោកស្រី ចេមី មាជ ភរិយារបស់លោក មាជ សុវណ្ណារ៉ា បាននិយាយក្នុងវីដេអូឃ្លីបថា តុលាការនៅក្នុងក្រុងឡូសអែនជឺឡេស រដ្ឋកាលីហ្វ័រញ៉ា នឹងបើកសវនាការនៅថ្ងៃចន្ទ ទី៦ ខែកុម្ភៈ វេលាម៉ោង៨.៣០នាទីព្រឹក លើសំណុំរឿងលោក មាជ សុវណ្ណារ៉ា ដែលប្តឹងនាយករដ្ឋមន្ត្រីកម្ពុជានិងលោក ហ៊ុន ម៉ាណែត។

លោកស្រី ចេមី មាជ ប្រាប់ទៅជនរួមជាតិដែលគាំទ្រលោក មាជ សុវណ្ណារ៉ា ឲ្យទៅចូលរួមនិងតាមដានករណីនេះនៅតុលាការសហរដ្ឋអាមេរិកនោះផងដែរ។ សវនាការនេះអត់ដូរពេលទេ គឺឡើងនៅថ្ងៃទី៦ ខែកុម្ភៈ ឆ្នាំ២០១៧៕

CEN
ដោយ: មុនីរាជ

តុលាការអាមេរិក បើកសវនាការរឿងលោកមាជ សុវណ្ណារ៉ា ប្តឹងនាយករដ្ឋមន្ត្រី និងកូនប្រុស

កីឡាប្រដាល់គុនខ្មែរ និងប្រដាល់សកលលែង ជ្រកក្រោមដំបូលសហព័ន្ធតែមួយ

ដើម្បីឆ្លើយតបទៅនឹងគោលការណ៍កំណែទម្រង់ស៊ីជម្រៅរបស់គណៈកម្មាធិការជាតិអូឡាំពិកកម្ពុជា(NOCC) និងក្រសួងអប់រំ យុវជន និងកីឡាក្នុងការត្រៀមស៊ីហ្គេមឆ្នាំ២០២៣ សហព័ន្ធកីឡាប្រដាល់កម្ពុជាបានប្រកាសបែងចែកសហព័ន្ធជាពីរដាច់ពីគ្នា គឺសហហព័ន្ធកីឡាប្រដាល់គុនខ្មែរ និងសហព័ន្ធកីឡាប្រដាល់សកលកម្ពុជា។ ថ្នាក់ដឹកនាំកីឡាប្រដាល់លើកឡើងថា បើពុំមានការបែងចែកទេនោះ សហព័ន្ធនឹងមិនមានកីឡាករដែលប្រកបដោយគុណភាពនោះឡើយ។

សហព័ន្ធកីឡាប្រដាល់កម្ពុជាកាលពីថ្ងៃទី១ ខែកុម្ភៈ បានរៀបចំហាសន្និបាតបូកសរុបការងារ និងដាក់ទិសដៅកំណែទម្រង់ឆ្ពោះទៅកាន់ស៊ីហ្គេមឆ្នាំ ២០២៣ នៅទីស្នាក់ការគណៈកម្មាធិការជាតិអូឡាំពិកម្ពុជា(NOCC)។ ក្នុងមហាសន្និបាតនោះ ថ្នាក់ដឹកនាំសហព័ន្ធ និងសមាជិកប្រតិបត្តិបានឯកភាពគ្នាបង្កើតសហព័ន្ធពីរដាច់ពីគ្នា គឺសហព័ន្ធកីឡាប្រដាល់គុនខ្មែរ និងសហព័ន្ធកីឡាប្រដាល់សកល។

ថ្នាក់ដឹកនាំសហព័ន្ធកីឡាប្រដាល់កម្ពុជាបានបញ្ជាក់ថា ការបែងចែកជាពីររវាងកីឡាប្រដាល់គុនខ្មែរ និងប្រដាល់សកលនេះ ដោយមានការឯកភាពផ្ទៃក្នុងពីសមាជិកសមាជិកាប្រតិបត្តិរបស់សហព័ន្ធ គឺពុំមានការល្អក់កករនឹងគ្នានោះឡើយ។ ម្យ៉ាងវិញទៀត ការបែងចែកសហព័ន្ធជាពីរនេះ ក៏ដើម្បីឆ្លើយតបទៅនឹងផែនការកំណែទម្រង់ស៊ីជម្រៅរបស់គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ដែលបានកណត់យកឆ្នាំនេះជាឆ្នាំកែទម្រង់សហព័ន្ធនីមួយៗ។

ការបែងចែកនេះធ្វើឡើងក្នុងគោលបំណង ដើម្បីបង្កភាពងាយស្រួលដល់ការគ្រប់គ្រង និងរៀបចំផែនការយុទ្ធសាស្ត្រក្នុងការអភិវឌ្ឍន៍វិស័យកីឡានេះឲ្យកាន់ល្អប្រសើរ។ លើសពីនេះ ដើម្បីជួយពង្រឹងបច្ចេកទេស និងសមត្ថភាពធនធានថ្នាលសម្រាប់ត្រៀមប្រកួតកីឡាស៊ីហ្គេមឆ្នាំ២០២៣។ ប៉ុន្តែបើពុំមានការកំណែទម្រង់បែបនេះ លោក តែម ម៉ឺន អតីតប្រធានសហព័ន្ធកីឡាប្រដាល់កម្ពុជា យល់ថា កម្ពុជានឹងពុំមានកីឡាករដែលមានសមត្ថភាពដើម្បីត្រៀមប្រកួតស៊ីហ្គេមគ្រប់គ្រាន់នោះឡើយ។

ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា នៅតែទទូចឲ្យបណ្តាសហព័ន្ធកីឡាជាតិទាំងអស់ ត្រូវធ្វើការកែទម្រង់ឲ្យស៊ីជម្រៅដើម្បីលុបបំបាត់វិវាទផ្ទៃក្នុង និងបង្កើនការឯកភាពគ្នាក្នុងការដឹកនាំ ដើម្បីជួយអភិវឌ្ឍន៍វិស័យកីឡាកម្ពុជាឲ្យកាន់តែរីកចម្រើន សម្រាប់ត្រៀមស៊ីហ្គេមឆ្នាំ២០២៣។

លោកបានបញ្ជក់ថា ៖«ដើម្បីឲ្យវិស័យកីឡារីកចម្រើន យើងត្រូវសហការរវាងក្រសួងអប់រំ យុវជន និងកីឡា NOCC និងសហព័ន្ធកីឡាជាតិ ព្រោះធាតុទាំងបីនេះ មិនអាចខ្វះគ្នាបានឡើយ។ ទន្ទឹមនឹងនេះ សហព័ន្ធកីឡាជាតិទាំងអស់ត្រូវរៀបចំផែនការ និងគោលដៅឲ្យច្បាស់លាស់ក្នុងការអភិវឌ្ឍ ដើម្បីត្រៀមប្រជែងដណ្តើមមេដាយក្នុងស៊ីហ្គេម»។

ទោះបីសហព័ន្ធត្រូវបានបែងចែកជាពីរក៏ដោយ ប៉ុន្តែថ្នាក់ដឹកនាំសហព័ន្ធថ្មី គឺជាមន្ត្រីមកពីសហព័ន្ធកីឡាប្រដាល់ចាស់ដដែល ពោលគឺគ្រាន់តែបន្ថែមតួនាទីប៉ុណ្ណោះ។ ក្នុងនោះលោក តែម ម៉ឺន ជាប្រធានសហព័ន្ធកីឡាប្រដាល់គុនខ្មែរ, លោក វ៉ា ស៊ិន ភិរម្យ អនុប្រធានទី១, លោកបណ្ឌិត ឆឹង យ៉ៅយ៉េន ជាអនុប្រធាន, លោក ម៉ិល កាដូ អគ្គលេខាធិការ និងអ្នកស្រី ប៉ឹង សំអាង ជាអគ្គហេរញ្ញិក។

ចំណែក សហព័ន្ធកីឡាប្រដាល់សកល គឺលោកបណ្ឌិត ឆឹង យ៉ៅយ៉េន ជាប្រធាន, លោក ស៊ិន ភិរម្យ, លោក ម៉ិល កាដូ និងលោក មាស វុទ្ធី ជាអនុប្រធាន, លោក ប៊ួយ សោភ័ណ្ឌ ជាអគ្គលេខាធិការ និងលោក និន វ៉ាន់ដា ជាអគ្គហេរញ្ញិក ព្រមទាំងសមាជិកប្រតិបត្តិចំនួន៩រូបផ្សេងទៀង។

យ៉ាងណាមិញ លោក វ៉ាត់ ចំរើន បានបញ្ជាក់ផងដែរថា ទោះបីសមាសភាពដែលដឹកនាំសហព័ន្ធទាំងពីរមកពីសហព័ន្ធចាស់តែមួយក៏ដោយ ប៉ុន្តែសហព័ន្ធកីឡាប្រដាល់គុនខ្មែរ និងសហព័ន្ធកីឡាប្រដាល់សកលជាសហព័ន្ធដាច់ដោយឡែកពីគ្នា ពោលគឺមិនអាចនៅជាមួយគ្នានោះឡើយ។ សហព័ន្ធនីមួយៗត្រូវស្វែងរកដៃគូសហការ និងអភិវឌ្ឍន៍រៀងៗខ្លួន៕

ថ្មិៗ
អត្ថបទ : សឿន វណ្ណឌេត

កីឡាប្រដាល់គុនខ្មែរ និងប្រដាល់សកលលែង ជ្រកក្រោមដំបូលសហព័ន្ធតែមួយ

រូបថត Beyonce ដែលពរពោះទទួលបានការ Like ជាង៩លាននៅ Instagram

រូបថតពរពោះកូនទីពីររបស់តារាចម្រៀង Beyonce នៅលើបណ្តាញសង្គម Instagram ទទួលបានបេះដូង (ការLike) ជាកំណត់ត្រា។ ពោលត្រឹមតែបីថ្ងៃប៉ុណ្ណោះ រូបថតនេះ មានការចុច Like រហូតដល់ទៅជាង៩លានឯណោះ។

កាលពីថ្ងៃទី១ ខែកុម្ភៈ តារាចម្រៀងលំដាប់ពិភពលោក Beyonce បានបង្ហោះរូបថតខ្លួនពរពោះជាមួយស្វាមី គឺ Jay Z ដែលជាអ្នកចម្រៀងរ៉េប និងជាអ្នកជំនួញ ដោយអះអាងជាកូនភ្លោះ បន្ទាប់ពីកូនស្រីអាយុ៥ឆ្នាំ Blue Ivy Carter។ រូបថតនេះ មានការផ្តល់សញ្ញាបេះដូងរហូតដល់ទៅជាង៩លាន ដោយគិតត្រឹមថ្ងៃទី៣ ខែកុម្ភៈ។

ចំនួននៃការចុច Like លើរូបថត Beyonce លើ Instagram បានបំបែកកំណត់ត្រារូបថតរបស់តារាចម្រៀង Selena Gomez ។ រូបថតផឹកកូកាកូឡារបស់ Gomez ដែលបង្ហោះកាលពី៣១សប្តាហ៍មុន មានការចុច Like ជាង៦លាន៕

ថ្មីៗ
អត្ថបទ : ធីតា

រូបថត Beyonce ដែលពរពោះទទួលបានការ Like ជាង៩លាននៅ Instagram

របាយការណ៍UN៖ កងកម្លាំងមីយ៉ាន់ម៉ា បានដុតផ្ទះ រំលោភ និងសម្លាប់ជនជាតិរ៉ូហ៊ីងយ៉ាយ៉ាងព្រៃផ្សៃ

អង្គការសហប្រជាជាតិទទួលបន្ទុកសិទ្ធិមនុស្ស នៅថ្ងៃទី០៣ កុម្ភៈ បានចេញរបាយការណ៍មួយ ដែលបានរកឃើញថា មានការរំលោភសិទ្ធិមនុស្សយ៉ាងធ្ងន់ធ្ងរទៅលើជនជាតិភាគតិចរ៉ូហ៊ីងយ៉ាដោយកម្លាំងរដ្ឋាភិបាលមីយ៉ាន់ម៉ានៅក្នុងរដ្ឋ Rakhine។ របាយការណ៍ បានចាត់ទុកការបំពាននេះ ថា អាចក្លាយជាបទល្មើសប្រឆាំងមនុស្សជាតិបាន។

របាយការណ៍ដែលចេញផ្សាយដោយការិយាល័យនៃឧត្តមស្នងការទទួលសិទ្ធិមនុស្ស (OHCHR) ដែលយោងតាមកិច្ចសម្ភាសន៍ជាមួយនឹងប្រជាជនដែលភៀសខ្លួនពីមីយ៉ាន់ម៉ា ក្រោយការវាយប្រហារនៅដើមខែតុលាឆ្នាំមុន បានបង្ហាញថា មានការករណីរំលោភ សម្លាប់ ដែលរាប់បញ្ចូលទាំងទារក និងកុមារ ការធ្វើទារុណកម្មព្រៃផ្សៃ និងសកម្មភាពរំលោភសិទ្ធិមនុស្សផ្សេងទៀតទៅលើជនជាតិភាគតិចរ៉ូហ៊ីងយ៉ាដោយកងកម្លាំងសន្តិសុខមីយ៉ាន់ម៉ា។

តាមចម្លើយដែលផ្សាយចេញតាមរបាយការណ៍នោះ កងកម្លាំងមីយ៉ាន់ម៉ា មិនត្រឹមតែប្រព្រឹត្តបទល្មើសប៉ុន្មានខាងលើនោះទេ តែពួកគេ ក៏បានដុតផ្ទះសម្បែង សាលារៀន ផ្សារ វិហារ និងដីស្រែជនជាតិភាគតិចទាំងនោះ និងថែមទាំងមានឃាត់ក្រុមទាំងនោះនៅក្នុងផ្ទះ ហើយដុតសម្លាប់ពួកគេតែម្តង។

តាមចម្លើយក្នុងរបាយការណ៍ដដែលនោះ ស្ត្រីច្រើនជាងពាក់កណ្តាល ដែលបានផ្តល់កិច្ចសម្ភាសន៍នោះ បានអះអាងថា ពួកគេសុទ្ធសឹងតែរងការឈឺចាប់ដោយសារការរំលោភ និងហិង្សាផ្លូវភេទជាច្រើនទម្រង់ផ្សេងទៀត។

ជុំវិញចម្លើយរបាយការណ៍នេះ ប្រធានឧត្តមស្នងការសិទ្ធិមនុស្សអង្គការសហប្រជាជាតិ Zeid Ra'ad Al Hussein បានប្រតិកម្មយ៉ាងដូច្នេះថា៖«អំពើឃោរឃៅទៅលើកុមាររ៉ូហ៊ីងយ៉ា គឺជារឿងដែលមិនអាចអត់ឳនបានឡើយ។ នេះ គឺជារឿងដែលគួរឲ្យស្អប់ខ្ពើមដែលបុរស(កងកម្លាំង) ចាក់សម្លាប់ទារក ដែលកំពុងតែស្រែកយំដើម្បីបំបៅដោះម្តាយ ខណៈម្តាយដែលបានឃើញឃាតកម្មនោះ ត្រូវបានរំលោភដោយកងកម្លាំងនោះ»។

ជាមួយគ្នានេះ ប្រមុខសិទ្ធិមនុស្សអង្គការសហប្រជាជាតិ ក៏បានទទូចឲ្យរដ្ឋាភិបាលមីយ៉ាន់ម៉ា បញ្ឈប់សកម្មភាពប្រឆាំងប្រជាជនខ្លួនឯង ហើយជំនួសដោយការបដិសេធពីហេតុការណ៍ដែលកើតឡើងនៅទីនោះ រដ្ឋាភិបាល ហើយទទួលស្គាល់ពីការទទួលខុសត្រូវដើម្បីទទួលថាជនរងគ្រោះអាចទទួលបានយុត្តិធម៌ សុវត្ថិភាព និងការប៉ះប៉ូវឡើងវិញ៕

ថ្មីៗ
អត្ថបទ : ថ្មីៗ

របាយការណ៍UN៖ កងកម្លាំងមីយ៉ាន់ម៉ា បានដុតផ្ទះ រំលោភ និងសម្លាប់ជនជាតិរ៉ូហ៊ីងយ៉ាយ៉ាងព្រៃផ្សៃ

លោក អេ ភូថង៖ ការធ្វើជាគ្រូបង្វឹកជម្រើសជាតិជាបំណងប្រាថ្នារបស់ខ្ញុំ

រូបភាពពីហ្វេសប៊ុកលោក អេ ភូថង

ក្រោយប្រកាសបែងចែកសហព័ន្ធជាពីរផ្សេងគ្នាកាលពីថ្ងៃទី១ ខែកុម្ភៈ សហព័ន្ធកីឡាប្រដាល់គុនខ្មែរបានបោះឆ្នោតជ្រើសតាំងលោក អេ ភូថង និងលោក ឈិត សារឹម ជាគ្រូបង្វឹកជម្រើសជាតិ ដើម្បីបង្វឹកកីឡាករត្រៀមស៊ីហ្គេមឆ្នាំ២០១៧នៅម៉ាឡេស៊ី។ តួនាទីជាគ្រូបង្វឹកជម្រើសជាតិនេះ លោក អេ ភូថង បញ្ជាក់ថា ជាបំណងប្រាថ្នារបស់លោកជាយូរមកហើយ។

កាលពីថ្ងៃទី៣ ខែកុម្ភៈ លោក អេ ភូថង និងលោក ឈិត សារឹម ត្រូវបានបោះឆ្នោតជ្រើសតាំងជាគ្រូបង្វឹកកីឡាគុនខ្មែរជម្រើសជាតិប្រចាំសហព័ន្ធកីឡាប្រដាល់គុនខ្មែរ។ ការបោះឆ្នោតជ្រើសតាំងនេះក្នុងគោលបំណងដើម្បីបង្វឹកកីឡាករជម្រើសជាតិកម្ពុជាត្រៀមចូលរួមប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ី នាថ្ងៃទី១៩ ខែសីហា ឆ្នាំ២០១៧ ខាងមុខនេះ។

ទោះបីបច្ចុប្បន្ន លោក អេ ភូថង ជាគ្រូបង្វឹកកីឡាប្រដាល់នៅក្លិប អេ ភូថង កីឡាក៏ដោយ ប៉ុន្តែសម្រាប់តួនាទីជាគ្រូបង្វឹកជម្រើសជាតិនេះ ជាក្តីស្រមៃដែលលោកបានប៉ងទុកជាយូរមកហើយ។ កីឡាករដែលចូលប្រឡូកក្នុងវិស័យកីឡាប្រដាល់តាំងពីក្មេងរូបនេះបានប្តេជ្ញាថា លោកនឹងខិតខំប្រឹងប្រែងឲ្យអស់ពីសមត្ថភាពតាមរយៈការយកបទពិសោធន៍ល្អៗ មកចែករំលែកក៏ដូចជាបង្វឹកដល់ក្មេងជំនាន់ក្រោយឲ្យរីកចម្រើនល្បីរន្ទឺលើកឆាកអន្តរជាតិ។

ថ្លែងប្រាប់សារព័ត៌មានថ្មីៗអតីតកីឡាករជើងខ្លាំងដើមកំណើតនៅខេត្តកោះកុងរូបនេះបានបញ្ជាក់យ៉ាងដូច្នេះថា៖«គោលបំណងរបស់ខ្ញុំគឺចង់ជួយជាតិ ពេលនេះគោលបំណងរខ្ញុំបានសម្រេចដូចក្តីស្រមៃហើយ។ ខ្ញុំមិននឹកស្មានថា ខ្លួនឯងបានក្លាយជាគ្រូបង្វឹកជម្រើសជាតិនោះទេ។ ខ្ញុំនឹងយកបទពិសោធន៍ដែលខ្ញុំមានមកបង្វឹកដល់ក្មេងៗជំនាន់ក្រោយឲ្យអស់ពីសមត្ថភាព។ ហើយខ្ញុំប្តេជ្ញា នឹងដឹកនាំកីឡាប្រដាល់សេរីឲ្យល្បីរន្ទឺលើឆាកអន្តរជាតិ»។

គួរបញ្ជាក់ថា ការបោះឆ្នោតជ្រើសតាំងគ្រូបង្វឹកជម្រើសជាតិមានបេក្ខភាពឈរឈ្មោះចំនួន៤៥នាក់ មកក្លិបដែលជាសមាជិករបស់សហព័ន្ធចំនួន៤៥។ ការបោះឆ្នោតដំណាក់កាលទី១ ក្នុងចំណោមបេក្ខជនទាំង៤៥នាក់ គឺជ្រើសរើសយកចំនួន៥នាក់។ បន្ទាប់មកបេក្ខជនទាំង៥នាក់ត្រូវឈរឈ្មោះឲ្យមន្ត្រីសហព័ន្ធបោះឆ្នោតបន្ត ដើម្បីជ្រើសរើសយកពីរនាក់មកធ្វើជាគ្រូបង្វឹកជម្រើសជាតិប្រចាំសហព័ន្ធ។

ការតែងតាំងគ្រូបង្វឹកជម្រើសជាតិប្រដាលគុនខ្មែរនេះ ធ្វើឡើងក្រោយសហព័ន្ធកីឡាប្រដាល់កម្ពុជាប្រកាសបែងចែកសហព័ន្ធជាពីរដាច់ពីគ្នានៅទីស្នាក់ការ NOCC កាលពីថ្ងៃទី១ ខែកុម្ភៈ នៅក្នុងមហាសន្និបាតបូកសរុបការងារប្រចាំឆ្នាំ និងដាក់ផែនការឆ្នាំ២០២៣។

ទន្ទឹមនឹងនេះ សហព័ន្ធកីឡាប្រដាល់សកលក៏បានបោះឆ្នោតជ្រើសតាំងគ្រូបង្វឹកជម្រើសជាតិរបស់ខ្លួនផងដែរក្នុងនោះលោក វ៉ែន សុផល និងលោក ហ៊ិន សៃហេង ជាគ្រូជម្រើសជាតិឈុតធំ និងលោក អាត់ សំរិទិ្ធ ព្រមទាំងលោក ឡុង ស៊ីលីន ជាគ្រូបង្វឹកយុវជនថ្នាល។

ក្រៅពីបោះឆ្នោតជ្រើសតាំងគ្រូជម្រើសជាតិប្រចាំសហព័ន្ធក៏មានការបោះឆ្នោតជ្រើសរើសកីឡាករជម្រើសជាតិចំនួន៦នាក់ ដើម្បីហ្វឹកហាត់ត្រៀមប្រកួតកីឡាស៊ីហ្គេមលើកទី២៩នៅម៉ាឡេស៊ីផងដែរ។ កីឡាករទាំងនោះរួមមាន កីឡាករ ឡៅ ចន្ទ្រា , ឡៅ ចិន្ត្រា, ម៉ន សាម៉េត, ឡុង សំណាង, ហ៊ឹម សេរី និងកីឡាករ ម៉ឺន សុភា៕

ថ្មីៗ
អត្ថបទ : សឿន វណ្ណឌេត

លោក អេ ភូថង៖ ការធ្វើជាគ្រូបង្វឹកជម្រើសជាតិជាបំណងប្រាថ្នារបស់ខ្ញុំ

ក្រសួងរៀបចំការប្រកួតការអាន ស្មូតកំណាព្យ និងតែងនិពន្ធ ដើម្បីចូលរួមក្នុងទិវាអំណាន

ភ្នំពេញ៖ ក្រសួងអប់រំ យុវជន និងកីឡា នឹងរៀបចំការប្រកួតប្រជែងការអាន ការស្មូតកំណាព្យ និងការតែងនិពន្ធជាលើកដំបូងទាំងថ្នាក់ក្រោមជាតិ និងថ្នាក់ជាតិ ដើម្បីជ្រើសរើសសិស្សឲ្យចូលរួមការអាន ក្នុងទិវាអំណាននាថ្ងៃទី១១ ខែមីនា ឆ្នាំ២០១៧។ នេះបើតាមសេចក្ដីណែនាំស្ដីពីការរៀបចំទិវាអំណាន របស់ក្រសួងអប់រំ យុវជន និងកីឡា។

យោងតាមសេចក្ដីណែនាំស្ដីពីការរៀបចំទិវាអំណាន ១១ មីនា ២០១៧ខាងមុខនេះ ក្រសួងអប់រំ យុវជន និងកីឡា នឹងរៀបចំការប្រកួតប្រជែងជាលើកដំបូងទាំងថ្នាក់ក្រោមជាតិ និងថ្នាក់ជាតិ សម្រាប់ជ្រើសរើសសិស្សចូលរួមការអាន ក្នុងទិវាអំណាន។

ក្រសួងអប់រំ ក៏បានដាក់នូវវិញ្ញាសាចំនួន ៣ សម្រាប់សិស្សានុសិស្សចូលរួមប្រកួតប្រជែងផងដែរ។ ចំពោះ វិញ្ញាសាការអានអត្ថបទ ផ្ដោតសម្រាប់សិស្សថ្នាក់ទី៦, ការស្មូតកំណាព្យ សម្រាប់សិស្ស ថ្នាក់ទី៩ និងការតែងនិពន្ធ សម្រាប់សិស្សថ្នាក់ទី១២។

ក្រសួងអប់រំ បញ្ជាក់ថា ការប្រកួតប្រជែងនឹងប្រព្រឹត្តិទៅនៅថ្ងៃទី ០៩ ដល់ថ្ងៃទី ១០ ខែមីនា ឆ្នាំ២០១៧ នៅវិទ្យាស្ថានបច្ចេកវិទ្យាកម្ពុជា។ បន្ថែមលើនេះ ការប្រកាសលទ្ធផល និងប្រគល់ពានរង្វាន់ដល់ជ័យលាភីលើវិញ្ញាសាទាំង៣ ទូទាំងប្រទេសនឹងប្រព្រឹត្តទៅក្នុងកម្មវិធីប្រារព្ធទិវាអំណានថ្នាក់ជាតិ នៅថ្ងៃទី១១ ខែមីនា ឆ្នាំ២០១៧។

ជាមួយគ្នានេះ សម្រាប់ការចំណាយលើដំណើរការប្រកួតប្រជែង នៅថ្នាក់គ្រឹះស្ថានសិក្សាថ្នាក់ក្រុង ស្រុក ខណ្ឌ និងរាជធានី-ខេត្តទាំងអស់ជាបន្ទុករបស់ថ្នាក់ក្រោមជាតិ ដោយមានកិច្ចសហការជាដៃគូអភិវឌ្ឍផ្សេងៗ។ ម្យ៉ាងទៀត ការចំណាយក្នុងដំណើរការប្រកួតប្រជែង និងការប្រារព្ធទិវាជាតិអំណានថ្នាក់ជាតិ ជាបន្ទុករបស់ក្រសួងអប់រំ យុវជន និងកីឡា។ ចំណែក ការចំណាយលើសោហ៊ុយធ្វើដំណើរ ហូបចុក និងស្នាក់នៅរបស់បេក្ខជនមកពី២៥ រាជធានី-ខេត្ត ដែលជាប់ជ័យលាភីលេខ១ ទាំងបីវិញ្ញាសា និងប្រាក់ឧបត្ថម្ភ និងពានរង្វាន់ ជាបន្ទុករបស់ក្រសួងអប់រំ៕

ថ្មីៗ
អត្ថបទ : ញឹក ស្រីល័ក្ខ

ក្រសួងរៀបចំការប្រកួតការអាន ស្មូតកំណាព្យ និងតែងនិពន្ធ ដើម្បីចូលរួមក្នុងទិវាអំណាន

កម្ពុជា-មីយ៉ាន់ម៉ា ប្តេជ្ញាបង្កើនទំហំពាណិជ្ជកម្ម និងពង្រីកវិស័យទេសចរណ៍

នៅថ្ងៃទី ៤ ខែកុម្ភៈ នេះ សម្តេចនាយករដ្ឋមន្ត្រី ហ៊ុន សែន បានជួបជាមួយ លោក U Htin Kyaw ប្រធានាធិបតីមីយ៉ាន់ម៉ា នៅវិមានសន្តិភាព។ ក្នុងជំនួបនេះ ប្រមុខរដ្ឋាភិបាលនៃប្រទេសទាំងពីរ បានលើកឡើងពីការពង្រឹងទំនាក់ទំនងរវាងកម្ពុជា និងមីយ៉ាន់ម៉ា និងជាពិសេស បង្កើនទំហំពាណិជ្ចកម្ម និងទេសចរណ៍។

ពេលជួបជាមួយសម្តេច ហ៊ុន សែន លោកប្រធានាធិបតីមីយ៉ានម៉ា U Htin Kyaw មានប្រសាសន៍ថា ទំហំពាណិជ្ជកម្មរវាងកម្ពុជា និងមីយ៉ាន់ម៉ា កើនឡើង កាលពីឆ្នាំ២០១៥ និង២០១៦ កន្លងទៅ។លោកថា សូចនាករនេះ បង្ហាញថា ប្រទេសទាំងពីរ នឹងមានសក្តានុពលយ៉ាងខ្លាំងក្នុងការពង្រីក និងពង្រឹង ទំនាក់ទំនងពាណិជ្ជកម្មរវាងប្រទេសទាំងពីរ។ បើតាមទំព័រហ្វេសប៊ុករបស់សម្តេច ហ៊ុន លោក U Htin Kyaw បានស្នើឲ្យពង្រីកបន្ថែមទៀត លើវិស័យទេសចរណ៍ ជាពិសេសគឺសុំឲ្យរដ្ឋមន្ត្រីទេសចរណ៍នៃប្រទេសកម្ពុជា និងមីយ៉ាន់ម៉ា ពង្រឹងកិច្ចសហការគ្នា ដើម្បីពិចារណាធ្វើយ៉ាងណាឲ្យមានការរៀបចំនូវទេសចរណ៍ជាកញ្ចប់ នៅទីក្រុងសៀមរាប និងទីក្រុងបាកាន។

ចំណែកសម្តេចនាយករដ្ឋមន្ត្រី ហ៊ុន សែន បានប្រាប់ទៅប្រធានាធិបតីមីយ៉ាន់ម៉ាថា ប្រទេសទាំងពីរគប្បីពិនិត្យមើលការងារអាទិភាពទាំងឡាយ ដើម្បីធ្វើយ៉ាងណា ជម្រុញទំនាក់ទំនងឲ្យកាន់តែស៊ីជម្រៅ។ ប្រមុខរដ្ឋាភិបាលកម្ពុជា បានឯកភាពក្នុងការជម្រុញទំហំពាណិជ្ជកម្ម និងវិស័យទេសចរណ៍ រវាងប្រទេសទាំងពីរឲ្យកើនឡើង។ ជាមួយគ្នានេះ សម្តេច ក៏បានផ្តល់ជាអនុសាសន៍ ឲ្យពិនិត្យមើលកិច្ចសហប្រតិបត្តិការ រវាងប្រទេសទាំងពីរ ក្នុងក្របខណ្ឌ ACMEC, CLMV, មេគង្គ, GMS ក៏ដូចជាអាស៊ាន ដែលយន្តការទាំងនេះ អាចជម្រុញកិច្ចសហប្រតិបត្តិការរវាងកម្ពុជា និងមីយ៉ាន់ម៉ា ឲ្យកាន់តែស្អិតរមួតបន្ថែមទៀត។

ថ្មីៗ
អត្ថបទ : រុង រឿង

កម្ពុជា-មីយ៉ាន់ម៉ា ប្តេជ្ញាបង្កើនទំហំពាណិជ្ជកម្ម និងពង្រីកវិស័យទេសចរណ៍

ធនាគារ ANZ Royal ទទួលសិទ្ធិប្រមូលចំណូលពន្ធទូទាំងប្រទេស

ភ្នំពេញ៖ ធនាគារ ANZ Royal គឺជាធនាគារថ្មីមួយទៀត ដែលរដ្ឋាភិបាលជ្រើសរើសជាដៃក្នុងការប្រមូលចំណូលពន្ធដារ។ ក្រសួងសេដ្ឋកិច្ចនិងហិរញ្ញវត្ថុ និងធនាគារ ANZ Royal បានចុះអនុស្សារណៈនៃការយោគយល់គ្នា (MOU) ស្តីពីការប្រើប្រាស់សេវាកម្មរបស់ធនាគារ ANZ Royal សម្រាប់ប្រតិបត្តិការចំណូលពន្ធដារ អនុវត្តទូទាំងប្រទេស នៅថ្ងៃទី៣ខែកុម្ភៈ។

លោក ជូ គឹមឡេង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្នុងពិធីចុះ MOU នេះថា ការបង្កើនដៃគូសម្រាប់ការប្រមូលចំណូលពន្ធដារបន្ថែមនេះ បានបង្ហាញនូវវឌ្ឍនភាពថ្មីបន្ថែមទៀតនៃកម្មវិធីកំណែទម្រង់វិស័យរដ្ឋបាលសារពើពន្ធ ដើម្បីលើកកម្ពស់ប្រសិទ្ធិភាពនៃការប្រមូលចំណូលពន្ធ ផ្ដល់ភាពងាយស្រួល និងជម្រើសច្រើនដល់អ្នកជាប់ពន្ធក្នុងការបង់ពន្ធដារតាមរយៈប្រព័ន្ធធនាគារ។

អគ្គនាយិការប្រតិបត្តិធនាគារ ANZ Royal លោកស្រី Leonie Lethbridge មានប្រសាសន៍ថា៖« ដោយមានការសហការយ៉ាងប្រសើររវាងអគ្គនាយកដ្ឋានពន្ធដារ និងធនាគារ ANZ Royal ឥឡូវយើងអាចសម្រួលការបង់ពន្ធដល់អតិថិជនសាជីវកម្មក្នុងស្រុក និងអន្តរជាតិដែលមានប្រតិបត្តិការតាមតំបន់ និងក្នុងប្រទេសកម្ពុជា»។ លោកស្រីបន្ថែមថា អតិថិជនសាជីវកម្មអាចបង់ពន្ធបានជាប្រាក់រៀល ឬប្រាក់ដុល្លារតាមសាខាធនាគារ ANZ Royal និងតាមប្រព័ន្ធធនាគារអេឡិចត្រូវនិក ចាប់ពីខែមេសាឆ្នាំនេះ។

ធនាគារ ANZ Royal គឺជាធនាគារដៃគូប្រមូលចំណូលពន្ធរបស់រដ្ឋាភីបាលទី៦ហើយ បន្ទាប់ពីធនាគារ អេស៊ីលីដា ភីអិលស៊ី, ធនាគារកាណាឌីយ៉ា ក.អ, ធនាគារឯកទេសវីង, ធនាគារកម្ពុជាសាធារណៈ និងធនាគារវឌ្ឍនៈ៕

ថ្មីៗ
អត្ថបទ : ញ៉ុង ហេង

ធនាគារ ANZ Royal ទទួលសិទ្ធិប្រមូលចំណូលពន្ធទូទាំងប្រទេស

ព្រះមហាក្សត្រ នឹងយាងសម្ពោធរឿង«មុនដំបូងខ្មែរក្រហមសម្លាប់ប៉ាខ្ញុំ»

ភ្នំពេញ៖ ព្រះករុណា ព្រះបាទ សម្តេច នរោត្តម សីហមុនី ព្រះមហាក្សត្រនៃកម្ពុជា នឹងយាងចូលរួមក្នុងពិធីចាក់បញ្ចាំងរឿង «មុនដំបូងខ្មែរក្រហមសម្លាប់ប៉ាខ្ញុំ» នៅថ្ងៃទី១៨ ខែកុម្ភៈនៅឧទ្យានអង្គរ ខេត្តសៀមរាប។លោក ស៊ិន ចន្ទសាយ៉ា ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ បានបញ្ជាក់ពីព័ត៌មាននេះ។

ភាពយន្តរឿង «មុនដំបូងខ្មែរក្រហមសម្លាប់ប៉ាខ្ញុំ» ដែលដឹកនាំផលិតដោយ តារាហូលីវូដលំដាប់កំពូល លោកស្រី Angelina Jolie នឹងចាក់បញ្ចាំងលើកដំបូងនៅថ្ងៃទី១៨ កុម្ភៈខាងមុខ នៅឧទ្យានអង្គរ ខេត្តសៀមរាប។

លោក ស៊ិន ចន្ទសាយ៉ា ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ បញ្ជាក់ប្រាប់អ្នកសារព័ត៌មាននៅថ្ងៃទី៣១ ខែមករា ថា ព្រះករុណា ព្រះបាទ សម្តេច នរោត្តម សីហមុនី ព្រះមហាក្សត្រនៃកម្ពុជា នឹងយាងចូលរួមក្នុងពិធីសម្ពោធភាពយន្តនេះ។

សម្រាប់ប្រធាននាយកដ្ឋានភាពយន្តរូបនេះ ការចាក់បញ្ចាំងភាពយន្តនិយាយពីរបបខ្មែរក្រហម ដែលថតនៅលើទឹកដីកម្ពុជានេះ គឺជាព្រឹត្តិការណ៍ដ៏ធំមួយ ដែលបង្ហាញពីប្រវត្តិសាស្ត្រកម្ពុជា។ លោក ស៊ិន ចន្ទសាយ៉ា បន្ថែមថា ភាពយន្តនេះ លោកស្រី Angelina Jolie ក៏គ្រោងចាក់បញ្ចាំងនៅពហុកីឡាដ្ឋានជាតិអូឡាំពិក នៅខេត្តបាត់ដំបង និងនៅតាមវត្តអារាមផងដែរ ដើម្បីឲ្យពលរដ្ឋកម្ពុជាបានទស្សនាភាពយន្តមួយនេះ។ ប៉ុន្តែកាលបរិច្ឆេទចាក់បញ្ចាំង នៅមិនទាន់កំណត់នៅឡើយ។

ខ្សែភាពយន្ត«មុនដំបូងខ្មែរក្រហមសម្លាប់ប៉ារបស់ខ្ញុំ» ផលិតឡើងផ្អែកលើការចងចាំដ៏ក្តុកក្តួលរបស់អ្នកនិ ពន្ធ លឿង អ៊ឹង ដែលកាលណោះគាត់មានអាយុ៥-៨ឆ្នាំ។ ខ្សែភាពយន្តនេះ ផលិតឡើងចេញពីការចងចាំរបស់ក្មេងស្រីរូបនេះ ដែលវាជាការមើលឃើញរបស់កុមារម្នាក់នៅក្នុងសង្គ្រាម ការយល់ និងទស្សនៈរបស់កុមារនោះអំពីសង្គ្រាម។ Angelina Jolie បានបញ្ជាក់ គ្រាដែលនាងបានមកកម្ពុជាដើម្បីបង្ហាញពីគម្រោងថតរឿងនេះថា ភាពយន្តនេះ គឺមិនមែនរម្លឹកដល់ការភ័យខ្លាច រន្ធត់នៃសង្គ្រាមនោះទេ ប៉ុន្តែដើម្បីនាំយកតួអង្គជាច្រើនមកបង្ហាញជូនទស្សនិកជនជុំវិញពិភពលោក នូវរឿងប្រវត្តិសាស្ត្ររបស់ខ្លួន។ Angelina Jolie បានបញ្ជាក់ទៀតថា ភាពយន្តនេះ មិនត្រឹមតែបង្ហាញពីរឿងរ៉ាវរបស់កុមារីម្នាក់ប៉ុណ្ណោះទេ បទពិសោធន៍របស់អ្នកដទៃទៀត ក៏នឹងដាក់បញ្ចូលទៅក្នុងខ្សែរភាពនេះដែរ វាក៏មិនត្រឹមតែបង្ហាញពីការចងចាំរបស់ក្មេងស្រីម្នាក់ទេ តែជាការចង់ចាំរបស់ប្រជាជនខ្មែរទាំងអស់៕

ថ្មីៗ
អត្ថបទ : ញឹក ស្រីល័ក្ខ

ព្រះមហាក្សត្រ នឹងយាងសម្ពោធរឿង«មុនដំបូងខ្មែរក្រហមសម្លាប់ប៉ាខ្ញុំ»

ពិធីបង្កក់កូន ៖ សុំដូនតាទទួលស្គាល់សមាជិកថ្មី និងខមាទោសយាយម៉ប

ពិធីកាត់សក់បង្កក់ឆ្មប ដែលអ្នកស្រុកអង្គរទម្លាប់ហៅយ៉ាងខ្លីថា បង្កក់កូន តាមពិតទៅជាពិធីដែលគេធ្វើឡើងដើម្បីសុំខមាទោស និងថ្លែងអំណរគុណចំពោះយាយម៉ប (ឆ្មប) ដែលបានជួយខ្នះខ្នែងទាំងយប់ព្រលប់ ក្នុងពេលឆ្លងទន្លេ។ មិនតែប៉ុណ្ណោះ ពិធីនេះក៏ធ្វើឡើងដើម្បីសែនដូនតាសុំឲ្យទទួលស្គាល់កូនចៅដែលទើបកើតមក បានរួមរស់សុខសប្បាយជាមួយសហគមន៍របស់ខ្លួនផង។

អ្នកនៅតំបន់អង្គរសព្វថ្ងៃ ទោះបីជាបានវិវត្តពីការឆ្លងទន្លេនៅតាមផ្ទះសម្បែង ទៅឆ្លងទន្លេនៅមន្ទីរពេទ្យដូចតំបន់ទូទៅក្តី ក៏នៅរក្សាទំនៀមកាត់សក់បង្កក់ឆ្មបដដែល។ អ្នកអង្គរបានអញ្ជើញស្ត្រីចំណាស់មួយរូប ដែលធ្លាប់មានមុខរបរជាយាយម៉បមកបំពេញកិច្ចនេះ។ ពុំមានកិច្ចពិធីអ្វីច្រើនទេ គេធ្វើត្រឹមតែមួយព្រឹកប៉ុណ្ណោះ ហើយបើពិនិត្យឲ្យដិតដល់ទៅ ចំណុចសំខាន់នៃពិធីគឺប្រហែល១ម៉ោងប៉ុណ្ណោះ។ ក្រៅពីនោះ មានតែការរៀបចំគ្រឿងរណ្តាប់ និងលៀងភ្ញៀវដែលមកចូលរួមតាមការអញ្ជើញរបស់សាមីពិធី។

គ្រឿងរណ្តាប់សំខាន់ដែលគេរៀបចំសម្រាប់ពិធីនេះមាន គ្រឿងស្លាធម៌បាយសីពីរថាស មួយថាសសម្រាប់អាចារ្យ និងមួយថាសទៀតសម្រាប់យាយម៉ប។ គ្រឿងរណ្តាប់ទាំងពីរថាសមិនមានអ្វីប្លែកគ្នាទេ ឃើញលើសតែថាសយ៉ាយម៉បបន្តិចត្រង់មាន កូនពានមួយដាក់អំបោះក្រហម កន្ត្រៃកាត់សក់ ស្និត ឡាមកោរសក់... សម្រាប់យាយម៉បធ្វើពិធីដូចជាកាត់សក់ កោរសក់ និងសង្កត់ព្រលឹងទារក។

ថ្មីៗ
អត្ថបទ : ថ្មីៗ

ពិធីបង្កក់កូន ៖ សុំដូនតាទទួលស្គាល់សមាជិកថ្មី និងខមាទោសយាយម៉ប

«បាតុភូតព្រះអាទិត្យរះចំកំពូលប្រាសាទអង្គរវត្ត» អាចនឹងកើតឡើងនៅថ្ងៃទី២០ ឬ២១ខែមីនាឆ្នាំនេះ

សេចក្ដីជូនដំណឹងដដែលនេះឲ្យដឹងថា៖«បាតុភូតព្រះអាទិត្យរះចំកំពូលប្រាសាទអង្គរវត្តនេះ ស្ដែងឲ្យឃើញពីអច្ឆរិយៈភាពនៃប្រាសាទអង្គរ ដែលត្រូវបានបុព្វបុរសខ្មែរយើងកសាង ដោយមានការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិយ៉ាងច្បាស់លាស់គួរឲ្យស្ងប់ស្ងែង»។

ចំពោះពេលវេលា បាតុភូតនេះ នឹងកើតឡើងនៅចន្លោះម៉ោង ៥ព្រឹក ទៅម៉ោង ៧ព្រឹក។ ជារៀងរាល់ឆ្នាំព្រឹត្តិការណ៍នេះ បានទាក់ទាញភ្ញៀវទេសចរជាតិ-អន្តរជាតិច្រើនកុះករមកទស្សនា និងផ្ដិតយករូបភាព។ នេះបើតាមសេចក្ដីជូនដំណឹងខាងលើ។

លោកបណ្ឌិត ច័ន្ទ រ័ត្ន ប្រធានសមាគមនៃអ្នកគណិតវិទ្យាកម្ពុជា និងជាប្រធាននាយកដ្ឋានស្រាវជ្រាវវិទ្យាសាស្ត្រនៃក្រសួងអប់រំ យុវជននិងកីឡា ដែលបានស្រាវជ្រាវឯកសារអំពីបាតុភូតនេះ ធ្លាប់បានប្រាប់សារព័ត៌មានថ្មីៗថា បាតុភូតនេះ គឺជាការគិតគូររបស់បុព្វបុរសខ្មែរដែលកសាងប្រាសាទអង្គរ ពោលគឺមិនមែនជារឿងចៃដន្យឡើយ៕

ថ្មីៗ
អត្ថបទ : ញ៉ុង ហេង

«បាតុភូតព្រះអាទិត្យរះចំកំពូលប្រាសាទអង្គរវត្ត» អាចនឹងកើតឡើងនៅថ្ងៃទី២០ ឬ២១ខែមីនាឆ្នាំនេះ

ទំហំពាណិជ្ជកម្មកម្ពុជា-ថៃ នៅឆ្នាំ២០១៦ មានទឹកប្រាក់ ៥,៦ ពាន់លានដុល្លារ

ពាណិជ្ជកម្មទ្វេភាគីកម្ពុជា-ថៃនៅឆ្នាំ ២០១៦ មានទំហំប្រហាក់ប្រហែលនឹងឆ្នាំ២០១៥ ដែរ គឺ មានទឹកប្រាក់ ៥,៥៩ពាន់លានដុល្លារ ធ្លាក់ចុះបន្តិច ០,០៤ភាគរយ។ នេះបើតាមរបាយការណ៍ពីស្ថានតំណងពាណិជ្ជកម្ម ប្រចាំស្ថានទូតថៃនៅកម្ពុជា។

របាយការណ៍ដដែលឲ្យដឹងថា ការនាំចេញទំនិញរបស់កម្ពុជាទៅប្រទេសថៃ ក្នុងអំឡុងឆ្នាំ២០១៦ មានទឹកប្រាក់ ៩៣៦លានដុល្លារ កើនឡើង ៤៦ភាគរយ បើធៀបនឹងឆ្នាំ២០១៥ ដែលមានតែចំនួន ៦៣៩លានដុល្លារ។ របាយការណ៍បង្ហាញទៀតថា ការនាំចូលផលិតផលពីប្រទេសថៃមកទីផ្សារកម្ពុជាមានតម្លៃ ៤,៩៥លានដុល្លារ ថយចុះ៦ភាគរយ បើធៀបនឹងឆ្នាំ២០១៥ ។

ការនាំចេញរបស់កម្ពុជាទៅប្រទេសថៃ ភាគច្រើនជាផលិតផលកសិកម្ម មានដូចជា ពោត សណ្ដែក ដំឡូងមី ជាដើម ខណៈប្រទេសថៃនាំចូលមកកម្ពុជាវិញលើទំនិញដូចជា គ្រឿងចក្រ ឧបករណ៍អេឡិចត្រូនិក គ្រឿងសំណង់ អាហារបរិភោគ គ្រឿងសម្អាងការ ប្រេងឥន្ធនៈ សម្ភារប្រើប្រាស់ក្នុងផ្ទះ និងផលិតផលបម្រើឲ្យវិស័យកសិកម្ម ជាដើម៕

ថ្មីៗ
អត្ថបទ : ថ្មីៗ

ទំហំពាណិជ្ជកម្មកម្ពុជា-ថៃ នៅឆ្នាំ២០១៦ មានទឹកប្រាក់ ៥,៦ ពាន់លានដុល្លារ

ចុងសប្តាហ៍នេះ Facebook «សីហា» ទម្លាយខ្សែអាត់សម្លេងសន្ទនាតំណាងរាស្រ្ត រៀល ខេមរិន្រ្ទ និង យ៉ោម បុប្ផា (Video inside)

facebookvid{457957781261026}

(ភ្នំពេញ)៖ នៅរសៀលថ្ងៃទី០៤ ខែកុម្ភៈ ឆ្នាំ២០១៧នេះ ម្ចាស់ Facebook ឈ្មោះ «សីហា» បានបន្តទម្លាយខ្សែអាត់សម្លេងសន្ទនារបស់អ្នកតំណាងរាស្រ្ត ថ្មីម្នាក់ទៀតឈ្មោះ រៀល ខេមរិន្រ្ទ និង យ៉ោម បុប្ផា។ Facebook ឈ្មោះ «សីហា» បានសរសេរដាក់ចំណងជើងថា៖ «រៀល ខេមរិន្ទ្រ ហុតទឹកសម្លឹងកាក យ៉ោម បុប្ផា ចោលសាច់ស្រវាឆ្អឹង» និងបានសរសេរថា «តំណាងរាស្រ្ត រៀល ខេមរិន្ទ្រ បានបំបែកបំបាក់ បំផ្លាញគ្រួសារគេឱ្យរលាយ-ឪពុកព្រាត់កូន ដោយដណ្តើមប្រពន្ធរបស់គេ»។ ក្រៅពីបង្ហោះខ្សែអាត់សម្លេងម្ចាស់ Facebook បានសរសេរៀបរាប់នូវខ្លឹមសារទាំងស្រុងដូចខាងក្រោម៖ «ដោយឃើញអំពើថោកទាបហួសហេតុពេករបស់តំណាងរាស្ត្របក្សសង្គ្រោះជាតិម្នាក់ និងស្ត្រីមានប្តី និងមានកូនទៀត ហ៊ានក្បត់ប្តីរត់ម៉ូតូឌុបធ្លាប់ កំសត់កម្រជាមួយគ្នា ទៅរួមរ័ក្សជាមួយសាហាយជាញឹកញាប់ភ្លេចប្តីភ្លេចកូន និងឈានទៅលែងប្តីទៅភ្ជាប់ពាក្យជាមួយអាម្សៀរនោះទៀត។ ប៉ុន្តែកម្មពារមានពិត ស្ត្រីម្នាក់នោះ ចោលសាច់ស្រវ៉ាឆ្អឹង ចង់បានងារជាជំទាវ ទៅយក រៀល ខេមរិន្ទ្រ ដែលកំពុងហុតទឹកសម្លឹងកាក។ ថ្ងៃនេះ ខ្ញុំសូមទម្លាយរឿងពិតរបស់មិត្តខ្ញុំម្នាក់រកស៊ីរត់ម៉ូតូឌុបជាមួយគ្នាឈ្មោះ លួស សាខន ដែលត្រូវបាន រៀល ខេមរិន្ទ្រ តំណាងរាស្ត្របក្សសង្គ្រោះជាតិ បំបែកបំបាក់ បំផ្លាញគ្រួសាររបស់គាត់ឱ្យរលាយ-ឪពុកព្រាត់កូន ដោយម្សៀរនោះបានដណ្តើមប្រពន្ធរបស់សាខន គឺ យ៉ោម បុប្ផា តារាបាតុកម្មបឹងកក់។ កាលពីអំឡុងឆ្នាំ២០១៣ ដោយដឹងថា យ៉ោម បុប្ផា មានដីត្រូវប៉ាន់ច្រើនឡូត៍នៅម្តុំបឹងកក់ មានសមត្ថភាពប្រមូលមនុស្សដឹកនាំធ្វើបាតុកម្មបាន ហើយជាមនុស្សលោភលន់ទៀតនោះ រៀល ខេមរិន្ទ្រ ក៏ព្យាយាមទាក់ទងក្នុងគំនិតព្រួញមួយបាញ់បានចាប៣៖ ទី១ ចង់បានទ្រព្យសម្បត្តិ យ៉ោម បុប្ផា, ទី២ ចង់បានខ្លួនអា បុប្ផា និងទី៣ ងាយស្រួលបញ្ជាអា បុប្ផា ឲ្យដឹកនាំធ្វើបាតុកម្ម។ ខ្ញុំឃើញ រៀល ខេមរិន្ទ្រ ប្រើប្រាស់តែមតំណាងរាស្ត្រ ហើយមកបឹងកក់បញ្ចុកបន្ស៊ី អាបុប្ផា ទាំងមិនទាន់លែងលះប្តី តាមរូបភាពបង្កើតភាពស្និទ្ធស្នាល ដោយផ្តើមចេញពីការជម្រុញ យ៉ោម បុប្ផា ឲ្យធ្វើបាតុកម្ម រហូតបោកបញ្ឆោតបានសម្រេច ដោយបំបែកនាងពីប្តីជាអ្នករត់ម៉ូតូឌុបរកមួយថ្ងៃស៊ីមួយថ្ងៃ និងឈានទៅភ្ជាប់ពាក្យជាមួយនាងថែមទៀតផង។ កុំថាតែ សាខន សូម្បីតែអ្នកនៅបឹងកក់ក៏ហួសចិត្តដែរ គឺរឿង រៀល ខេមរិន្ទ្រ បំបែកឆក់យកប្រពន្ធគេ! ប៉ុន្តែ បានតែមួយភ្លែត ក្រោយពេលដែលដឹងច្បាស់ថា ការគិតរបស់ខ្លួនពីមុនខុសទាំងស្រុង គឺទ្រព្យសម្បត្តិរបស់ យ៉ោម បុប្ផា បែរជាដាក់ឈ្មោះម្តាយនាងទាំងអស់ រៀល ខេមរិន្ទ្រ មានការខកចិត្តយ៉ាងខ្លាំង រួមផ្សំនឹងរួមរ័ក្សជាមួយអា បុប្ផា ដែលជាស្រីមានកូនរួចទៅហើយ ឆ្អែតឆ្អន់ទៀតនោះ ធ្វើឲ្យ រៀល ខេមរិន្ទ្រ មួរម៉ៅក្តៅក្រហាយ រករឿងឈ្លោះជាមួយអា បុប្ផា ស្ទើរាល់ថ្ងៃ។ ថ្ងៃមួយដោយខ្លាច យ៉ោម បុប្ផា បកអាក្រាតហែកកេរ្តិ៍ នូវអំពើលាមករបស់ខ្លួន ខេមរិន្ទ្រ ភ័យស្លន់ស្លោរឡើងញ័រមាត់ ស្រែកគំហកដាក់អា បុប្ផា ខ្លាំងៗ គម្រាមកុំឱ្យនិយាយ។ Fresh News

ចុងសប្តាហ៍នេះ Facebook «សីហា» ទម្លាយខ្សែអាត់សម្លេងសន្ទនាតំណាងរាស្រ្ត រៀល ខេមរិន្រ្ទ និង យ៉ោម បុប្ផា (Video inside)

អស្ចារ្យមែន! កូរ៉េខាងត្បូង «ទទួលជោគជ័យលើការវះកាត់ប្តូរប្រអប់ដៃ» ជាលើកដំបូង!

(សេអ៊ូល)៖ ក្រុមគ្រូពេទ្យជំនាញវះកាត់របស់កូរ៉េខាងត្បូងមួយក្រុម បានសម្រេចនូវការវះកាត់ប្តូរប្រអប់ដៃ ជាលើកដំបូងទៅលើបុរសវ័យខ្ទង់ ៣០ឆ្នាំម្នាក់ ដែលវាជា ជោគជ័យទីមួយហើយសម្រាប់កូរ៉េខាងត្បូង ដែលបានសម្រេចចេញនូវលទ្ធផលបែបនេះក្នុងប្រទេសរបស់ខ្លួន។ នេះបើតាមការដកស្រង់ការផ្សាយដោយទីភ្នាក់ងារ ព័ត៌មានយ៉ុនហាប់ នារសៀលថ្ងៃសៅរ៍ ទី០៤ ខែមករា ឆ្នាំ២០១៧។ ក្រុមគ្រូពេទ្យខាងលើនេះមានសមាជិកសរុប ២៥នាក់ ដឹកនាំដោយលោក Woo Sang Hyun ប្រធានមន្ទីរពេទ្យ W Hospital បានសម្រេចចិត្តវះកាត់យកប្រអប់ដៃ ពីបុរសម្នាក់ដែលមានអាយុ ៤០ឆ្នាំ ដែលខួរក្បាលរបស់គាត់លែងដំណើរការទៅហើយ (ស្លាប់)។ ការវះកាត់ត្រូវបានចំណាយពេល ១០ម៉ោង នៅឯមជ្ឈមណ្ឌលវេជ្ជសាស្ត្រនៃសាកលវិទ្យាល័យ Yeungnam ទីក្រុងដេហ្គូ ភាគអាគ្នេយ៍ប្រទេសកូរ៉េខាងត្បូង។ គួរបញ្ជាក់ថាដៃដែលត្រូវបានវះកាត់យកមកផ្សាំឲ្យបុរសម្នាក់ទៀតខាងលើនេះ មានផ្នែកប្រអប់ដៃ និងកុំភួនដៃ។ ក្រោយការវះកាត់រួចរាល់ជាស្ថាពរកាលពីថ្ងៃសុក្រ ក្រុមគ្រូពេទ្យបានអះអាងថា បុរសដែលទទួលបានដៃថ្មីគឺមានស្ថានភាពសុខភាពល្អធម្មតា ប៉ុន្តែរាងកាយរបស់លោកត្រូវការពេលវេលាយូរ ដើម្បីកម្រើកជាធម្មតាឡើងវិញ ដោយសារតែបានចំណាយពេលវេលាយូរក្នុងការវះកាត់ប្តូរដៃ៕ Fresh News

អស្ចារ្យមែន! កូរ៉េខាងត្បូង «ទទួលជោគជ័យលើការវះកាត់ប្តូរប្រអប់ដៃ» ជាលើកដំបូង!

ប្រទេសចិនចេញមុខព្រមានអាមេរិក៖ «កុំក្រឡុកស្ថានការណ៍នៅអាស៊ីបូព៌ា, ឈប់លើកឡើងនូវអ្វីដែលខុសពីការពិត!»

(ប៉េកាំង)៖ ប្រទេសចិនបានព្រមានទៅសហរដ្ឋអាមេរិកថា កុំក្រឡុកស្ថានការណ៍នៅតំបន់អាស៊ីបូព៌ាតទៅទៀត ដែលការព្រមានធ្ងន់ៗនេះធ្វើឡើងបន្ទាប់ពីរដ្ឋមន្ត្រីការពារជាតិថ្មីរបស់អាមេរិក លោក Jim Mattis កំពុងបំពេញទស្សនកិច្ចនៅជប៉ុនបានលើកឡើងថា ប្រជុំកោះស៊ិនកាគុ (ចិនហៅតាវយុ) គឺត្រូវបានការពារដោយសន្ធិសញ្ញារវាងជប៉ុន-អាមេរិក។ នេះបើតាមការចេញផ្សាយនៅមុននេះបន្តិច ដោយ Channel News Asia ដកស្រង់ពីបណ្តាញ Reuters នារសៀលថ្ងៃសៅរ៍ ទី០៤ ខែកុម្ភៈ ឆ្នាំ២០១៧។ គួរបញ្ជាក់ថាប្រជុំកោះស៊ិនកាគុ ដែលចិនហៅថាតាវយុ និងកំពុងស្ថិតនៅក្រោមការគ្រប់គ្រងរបស់ជប៉ុននៅឡើយនោះ គឺជាទីតាំងប្រកបដោយសក្កានុពលមួយដែលអំណោយផលលើការនេសាទធនធានសមុទ្រ ដែលជប៉ុនទន្ទ្រានគ្រប់គ្រងនៅសម័យសង្គ្រាមលោក ប៉ុន្តែបើតាមភាពជាក់ស្តែងនៃតឹកតាងប្រវត្តិសាស្ត្រប្រទេសចិនធ្លាប់បានគ្រប់គ្រងលើប្រជុំកោះទាំងអស់នេះ អស់រាប់សតវត្សរ៍មកហើយ។ អ្នកនាំពាក្យក្រសួងការបរទេសចិន លោក លូ កាង បានលើកឡើងប្រាប់ស៊ិនហួរថា «ប្រជុំកោះតាវយុ និងតំបន់ព័ទ្ធជុំវិញគឺជាដែនដីប្រវត្តិសាស្ត្ររបស់ប្រទេសចិន តាំងពីបុរាណកាលមកម្ល៉េះ ដែលគ្មាននរណាម្នាក់ អាចប្រកែកពីការពិតជាប្រវត្តិសាស្ត្រនេះបានឡើយ។ យើងអំពាវនាវឲ្យភាគីអាមេរិកទទួលខុសត្រូវចំពោះឥរិយាបថរបស់ខ្លួន ហើយឈប់ធ្វើការលើកឡើងដោយខុសពីការពិត និងសូមឈប់ដុតរោលស្ថានការណ៍ឲ្យកាន់តែយ៉ាប់យឺនជាងនេះទៀតនៅក្នុងតំបន់»។ គួរបញ្ជាក់តាមសម្តីរបស់លោក Mattis នៅក្នុងជំនួបជាមួយរដ្ឋមន្ត្រីការពារជាតិជប៉ុនថា សហរដ្ឋអាមេរិករក្សាគោលនយោបាយឥតកែប្រែចំពោះជំហររបស់ខ្លួនលើបញ្ហាប្រជុំកោះ ស៊ិនកាគុ ហើយអាមេរិកបន្តគាំទ្រប្រទេសជប៉ុនក្នុងការគ្រប់គ្រងប្រជុំកោះនោះតទៅទៀត៕ Fresh News

ប្រទេសចិនចេញមុខព្រមានអាមេរិក៖ «កុំក្រឡុកស្ថានការណ៍នៅអាស៊ីបូព៌ា, ឈប់លើកឡើងនូវអ្វីដែលខុសពីការពិត!»

អយុត្តិធម៌ណាស់សម្រាប់ពលរដ្ឋកម្ពុជា ! អាមេរិកទម្លាក់គ្រាប់បែកសម្លាប់ជាងកន្លះលាននាក់ហើយ, លុយថ្លៃគ្រាប់បែកជិត៥០០លានដុល្លារទៀត !

(ភ្នំពេញ)៖ ក្រោយការថ្លែងរបស់ឯកអគ្គរាជទូត សហរដ្ឋអាមេរិកប្រចាំកម្ពុជា លោក William Heidt ក្នុងវេទិកាតុមូល នាថ្ងៃម្សិលមិញ ហើយត្រូវបាន វិទ្យុអាស៊ីសេរី ដែលមាននិន្នាការគាំទ្របក្សប្រឆាំង និងសហរដ្ឋអាមេរិក បានដកស្រង់សំដីមកចុះផ្សាយ ដោយលើកឡើងថា សហរដ្ឋអាមេរិកមិនដែលបាន ពិចារណាក្នុងការលុបបំណុលពីកម្ពុជា ហើយថារហូតមកដល់ពេលនេះបំណុលបានកើនដល់ជិត៥០០លានដុល្លារនោះ, លោក ហេង រតនា អគ្គនាយកមជ្ឈមណ្ឌល កំចាត់មីនកម្ពុជា ដែលជាអ្នកដឹកនាំប្រតិបត្តិការរំដោះមីន បានសម្តែងនូវការសោកស្តាយយ៉ាងណាស់ចំពោះបញ្ហានេះ ហើយថា ការលើកឡើងយ៉ាងដូច្នេះ វាពិតជាអយុត្តិធម៌ណាស់ ព្រោះវាគឺជាការបន្ថែមនូវក្តីឈឺចាប់ខ្លាំងក្លាដល់ពលរដ្ឋស្លូតត្រង់របស់កម្ពុជា។ ថ្លែងប្រាប់អង្គភាព Fresh News នៅរសៀលថ្ងៃទី៤ ខែកុម្ភៈ ឆ្នាំ២០១៧នេះ លោក ហេង រតនា បានលើកឡើងជាថ្មីម្តងទៀតដោយចាត់ទុកថា ការថ្លែងពីបញ្ហាបំណុលរបស់ឯកអគ្គរដ្ឋទូតអាមេរិក ជាការបន្ថែមក្តីឈឺចាប់ ដែលមិនអាចបំភ្លេចបានឡើយ សម្រាប់ប្រជាជនខ្មែរ ដែលត្រូវបានរងទុក្ខ យ៉ាងធ្ងន់ធ្ងរដោយសារការទម្លាក់គ្រាប់បែករាប់លានគ្រាប់ របស់សហរដ្ឋអាមេរិក មកលើទឹកដីកម្ពុជា ហើយកម្ពុជាត្រូវសងបំណុលអាមេរិក ដែលជាថ្លៃគ្រាប់បែក ដែលទម្លាក់មកលើប្រទេសរបស់ខ្លួនទៀត។ លោកលើកឡើងទៀតថា ការប្រកាសពីចំនួននៃការកើនឡើងបំណុល ចាប់ពី២០០លានដុល្លារ ដល់៥០០លានដុល្លារ គឺជាការបន្ថែមនូវការឈឺចាប់ របស់ប្រជាពលរដ្ឋខ្មែរ ដែលរួមមាន អ្នករបួស អ្នកពិការ និងវិញ្ញាណក្ខន្ធអ្នកស្លាប់ ដោយសារគ្រាប់បែកទម្លាក់ដោយអាមេរិក។ ជាមួយគ្នានេះ លោក ហេង រតនា យល់ឃើញថា «ការបង្កើតក្រុមការងារ ដើម្បីពិភាក្សាករណីរឿងបំណុល ដែលកម្ពុជាជំពាក់នោះ ជាប្រការសមហេតុសមផលហើយ។ ទន្ទឹងនឹងនេះគួរតែមានក្រុមការងារពិភាក្សាប្រកបដោយតម្លាភាព អំពីផលខូចខាត ដោយសារសហរដ្ឋអាមេរិក ដែលបានទំលាក់គ្រាប់បែកជាសំងាត់ក្តី ជាចំហរក្តីក្នុងន័យវាយតំលៃឲ្យច្បាស់លាស់ ដើម្បីងាយស្រួលសំរាប់រដ្ឋបាល សហរដ្ឋអាមេរិក មានការទទួលខុសត្រូវ ជាកាតព្វកិច្ចខាងសីលធម៌កី្ត ការទទួលខុសត្រូវ ខាងផ្លូវច្បាប់ក្តី (Moral Obligation or Legal Obligation) ក្នុងការបញ្ចប់ទំពរ័ខ្មៅងងឹង ពីអតីតកាល និងរួមគ្នាសហការល្អ សំរាប់អនាគតនៃប្រទេស និងប្រជាជនទាំង២»។ យ៉ាងណាក៏ដោយ លោកអគ្គនាយកស៊ីម៉ាក់ ហេង រតនា ធ្លាប់បានប្រៀបប្រដូចការទម្លាក់គ្រាប់ របស់អាមេរិកមកលើកម្ពុជា ដូចទៅនឹងការយកដំបងដ៏ធំមួយ មកវាយសំពងសម្លាប់កម្ពុជា ប៉ុន្តែកម្ពុជាមិនស្លាប់បែរជាត្រូវគេ ទាមទារឲ្យសងថ្លៃដំបងថែមទៀត ដូចគ្នានឹងការទម្លាក់គ្រាប់បែក របស់អាមេរិកផងដែរ គឺអាមេរិកបានទម្លាក់គ្រាប់បែកមកលើកម្ពុជា ហើយអាមេរិក បែរជាមកទារថ្លៃគ្រាប់បែករបស់ខ្លួនទៀត។ ពាក់ព័ន្ធបញ្ហាបំណុលអាមេរិកនេះផងដែរ លោកទេសរដ្ឋមន្ត្រី សេរី កុសល អនុប្រធានទី១ អាជ្ញាធរមីនកម្ពុជា ធ្លាប់បានថ្លែងប្រាប់អង្គភាព Fresh News ដោយបានចាត់ទុកបំណុលនេះ ជាបំណុលឈាម។ បំណុលឈាម ដែលអាមេរិកបានទម្លាក់គ្រាប់ បែកសម្លាប់ប្រជាជនខ្មែរជាង៥សែននាក់។ លោកទេសរដ្ឋមន្ត្រី សេរី កុសល បានចាត់ទុកសហរដ្ឋអាមេរិក ជាប្រទេសដែលមានឈាមខ្មៅ ចំពោះប្រទេសកម្ពុជា មិនសមជាប្រទេសមហាអំណាច។ លោកថា បំណុលដែលកម្ពុជាជំពាក់នោះ គឺជាបំណុល ដែលជំពាក់ដោយរដ្ឋាភិបាលមិនស្របច្បាប់ លន់ នល់ ជំពាក់, រដ្ឋាភិបាលមិនស្របច្បាប់ ដែលបានធ្វើប្រហារទម្លាក់ សម្តេចនរោត្តម សីហនុ និងធ្លាក់ចេញពីអំណាច ដោយសារចាញ់សង្គ្រាម ព្រមទាំងជារដ្ឋាភិបាលដែលលើកបន្តុប ដោយសហរដ្ឋអាមេរិក។ កាលពីថ្ងៃទី២០ ខែមករា ឆ្នាំ២០១៧ អំឡុងពេលចូលរួមវេទិកាសេដ្ឋកិច្ចពិភពលោក នៅប្រទេសស្វីស សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសម្តងទៀត ដោយបានស្នើជាថ្មីឲ្យរដ្ឋាភិបាលសហរដ្ឋអាមេរិក លុបបំណុលដល់កម្ពុជា ដែលអាមេរិកផ្តល់ឲ្យរដ្ឋាភិបាលលោកសេនាប្រមុខ លន់ នល់ ចន្លោះពីឆ្នាំ១៩៧០ ដល់ឆ្នាំ១៩៧៥ ព្រោះជាបំណុលកខ្វក់។ នាយករដ្ឋមន្រ្តីកម្ពុជា សម្តេចតេជោ ហ៊ុន សែន បានចាត់ទុកថា កាលណោះអាមេរិកគឺជាអ្នកជំរុញឱ្យមានរដ្ឋប្រហារទម្លាក់សម្តេច នរោត្តម សីហនុ នៅក្នុងប្រទេសកម្ពុជា ដែលរដ្ឋប្រហារនេះ បានបង្កើតសង្រ្គាមនៅក្នុងប្រទេសកម្ពុជា និងបង្កើតខ្មែរក្រហម ទើបមានវិនាសកម្មធ្ងន់ធ្ងរ ដល់ប្រទេសកម្ពុជា ដូច្នេះសហរដ្ឋអាមេរិក ត្រូវតែប៉ះប៉ូវសងដល់កម្ពុជាវិញ តាមរយៈការលុបបំណុល សម្រាប់សងដល់វិនាសកម្មនេះ។ អគ្គនាយក CMAC លោក ហេង រតនា បានបញ្ជាក់ថា អាមេរិកបានទម្លាក់គ្រាប់បែកនៅកម្ពុជា ពីដើមឆ្នាំ១៩៦៣ ដល់ដើមឆ្នាំ១៩៧៥ ហើយទិន្នន័យ ដែលត្រូវបានឯកភាពដោយ ប្រធានាធិបតី Bill Clinton នៅឆ្នាំ២០០០ បញ្ចេញជាឯកសារចំហរថា អាមេរិកទម្លាក់គ្រាប់បែកនៅកម្ពុជា ២លាន៨សែនតោន និងគ្រាប់បែកគីមីផងដែរ ពីថ្ងៃទី០៥ ខែតុលា ឆ្នាំ១៩៦៥ ដល់១៩៧៣ ក្រោមលេសថា តាមកំទេចពួកយៀកកុង យួនឈ្លានពាន ប៉ុន្តែស្លាប់តែខែ្មរជាង ៥០០,០០០នាក់់ សម្លាប់ដោយផ្ទាល់ និងកំទេចតែភូមិ ផ្ទះសម្បែងខែ្មររាប់ម៉ឺនកន្លែង៕ Fresh News

អយុត្តិធម៌ណាស់សម្រាប់ពលរដ្ឋកម្ពុជា ! អាមេរិកទម្លាក់គ្រាប់បែកសម្លាប់ជាងកន្លះលាននាក់ហើយ, លុយថ្លៃគ្រាប់បែកជិត៥០០លានដុល្លារទៀត !

Menu